بوقت من البطى وبليل تتراقص شياطينه
بعد شفت الضياء ينزع من ثياب المساء ثلثين
تحايلت المنام اللي مثل بيتك تمرينه
وانا اللي من تفارقنا وانا ماغمضت لي عين
غريبه كل حلم يمر في بالي تزورينه
والأغرب كيف احلم الحلم وارجع واحلمه بعدين
قبل يومين شفتك في المنام وقمت من حينه
ونمت أمس ورجع نفس المنام اللي قبل يومين
انا اللي قبل اسافر شلت قلبي من شرايينه
تركته في يدك مثل الامانه واحفظيها زين
ترى حفظ الامانه دين مجبوره تردينه
اجل مافيه حد قد قالك حفظ الامانه دين
مرد الملفي بيلفي ويستوفي وتوفينه
بعد ليله ثلاثه اربعه عشره شهر شهرين
اذا انتي منتي بقد الكلام اللي تقولينه
حرام استأمنك حاجه واذا جيت اطلبك تنسين
تخونين وتبين ارضى واحد يرضى تخونينه
انا لاجيتك اخونك مع حبيبه ثانيه ترضين
من اول مارجعت من السفر ماشفتلك بينه
وانا اللي كنت احسبك قبل ادوس ارض المطار تجين
تكونين انتي اول شخص عيني تحتضن عينه
وكنت اتخيلك من زود فرحت رجعتي تبكين
واشوف بدمعتك حكيك واعرفه قبل تحكينه
واجيب احلى من اللي بتحكينه واتركك تحكين
تقولين الوطن نور وأقول بنور مظوينه
تقولي لي غديت احلى واقول عيونك الحلوين
كلامٍ نام بشفاتك وخفتي لاتصحينه
ذخرتيه الغرام اللي ينام ويتركك تصحين
تغانمتي غرامي لين رجحتي موازينه
تعلم من يدك لمس الكفوف وعلمك تجفين
وليتك لاقيت به شي فيني ماتلاقينه
ماهو بغرور ولكن خابرك مالك امل تلقين
تغافلك بغلا والا الحلا ماهو بمنزينه
تحليه الصور والا الصحيح ابن الحلال زوين
وانا ماني بناقص عنه يومنك تبدينه
نصيبي هو نصيبي لو يسددها من الصوبين
قنوع بمظهري والسم مايذبح ثعابينه
على قول المثل ماني حلو لكن ماني شين
اذا اهداك الزهر مره انا اهديتك بساتينه
واذا الهاك بفرح ليله فانا تهت لبكاك سنين
واذا استضعفتك املاكه وشتتك ملايينه
انا حتى فتات الخبزه اقسمها معك نصفين
طموحي بس اجي واظفر بشي تستحقينه
تدينته تسلفته سرقته مو مهم منين
كأني من كثر ما أرضى بكل اللي تمنينه
لو انك تطلبين الله يعنيني باقول آمين
أنا ما ألعب على الحبلين وقت الطيش وسنينه
تبين الحين يومني كبرت العب على الحبلين
ترى عند البدو بالذات عيب اللي تسوينه
حلاتك لاعشقتيني تعشقيني ليوم الدين
غرامٍ تسكن اظلوعه حشيمه من مجانينه
جفا يجمع محبتنا ولا عشقٍ يذل اثنين
اكثار اللي تحدوني وقالوا لي تحبينه
آمانه لاتخليني صغير في عينهم تكفين
لأني كل ماقالوا تخون اقول مسكينه
عليك الله وأمانه علميهم منهو المسكين
انا خايف إليا طاح الجمل تكثر سكاكينه
وانا ماعادت ظلوعي تقوى طعنة السكين
مثل ما قالوا المكتوب واضح من عناوينه
لو ارحل منك للغربه بأسافر من ظلامك وين
كفايه كل حلم برقادي تزورينه
كفايه من تفارقنا وانا ما غمظت لي عين
قبل يومين شفتك في المنام وقمت من حينه
ونمت امس ورجع نفس المنام اللي قبل يومين
الــــــحــــــلــــــم 
العرض الشجري
