شخص يروي قصة غزل ماسويه انتهت بكارثه ترجمها صاحبها بها الابيات :
يجهل الجاهل على جهل الجهول
ويتحمل من جهل جهل الجهال
لاسقى الله ساعة بالعثيم مول
رحت اودي حرمتي بعد الزوال
واختبرت القلب في ساعة فضول
كنت اضنه راسين مثل الجبال
مادريت اني على الفلس محبول
وقيده اللي مايرده والعقال
جيت سوقن جامعن من كل زول
الكناري والقماري والغزال
قمت اطالع واتمشى في ذهول
واتلفت من يمين ومن شمال
وارتبشت وطحت في باب الدخول
طحت مابين المحاسب والسلال
والسبب من داعج العين البتول
فوق رمشه حاجبه كنه هلال
سيف خشمه والوجن وردن ذبول
ومن ورا الشيله لخديه اشتعال
الثنايا في تبسمها الخجول
ساطعاتن سابحتن بالزلال
وعنقها مفهوق والكتف مهدول
والمشى مشي الرزينات الثقال
والخصر ملهوف والردف معزول
ياولد كنها بعض الدلال
وصدرها مزموم والجيب محلول
وان مشت جاني من الهز اختلال
والردايف لامشت شي يهول
من تحت ثوبه غدا لهن اجتوال
كن ردفه بالطلوع وبالنزول
لامشت يعطي دروسا بالضلال
او يحرج من يسوم وكم نقول
او بروقن مرهشاتن في خيال
وشفت شي بس ماودي اقول
وشفت شين غير هذا مايقال
اشهد انه سجلت بالقلب قول
وكبري بالكبد من تحت الطحال
تلعب الفتبول وايضا الهارت بول
مايجاريها النصر ولا الهلال
وارسل الشيطان من عنده رسول
امتخصص في علوم الانحلال
قال يالله قم تحرك ياكسول
ماتلاقي غيرها في هالكمال
وجيتها خايف ولا ادري ويش اقول
واستحت هي وابعدت بنت الحلال
وجيت اكلمها ويلا تقل مغيول
وراح صوتي وصار بالعين احولال
واتشجع قلت يابنت معقول
كل هذا فيك من زين وجمال
قالت ابعد قلت ماشين يحول
بيننا واللي تبين بلا سؤال
قالت اسمع مانت جاهل بالاصول
ضف وجهك لافضحك بين الرجال
قلت بالله بس هرجك لايطول
وادفع فلوس المقاضي بالريال
بالمرق وجهي مع الناس مغسول
ماستحي قالت اجل قرب تعال
واخطفت قوطي من الادراج فول
المدمس العريض من الطوال
وصكتن به صكت القرم الفتول
وشقت الجبهه ودم الراس سال
ثم قامت تضربن باللي تطول
وفزعت معها على ام العيال
وفزعن كل الحريم بدون قول
يضربنن بالقواطي والنعول
وبالمكانس والصواني والسطول
والعجايز يفزعن لو بالتفال
اخلطني خلط عجان معمول
واضربني ضرب قوات احتلال
وطلعوني سحب ماني بمحمول
ساعتن بالشمس ماني بالضلال
الشعر منحال والوجه امعفول
والثياب مقطعاتن والنعال
كني اللي اكلن كيلو هلول
ريحتن ماهيب حتى بالخيال
وعقب هذا صرت اذل من الذلول
تركبن ام العيال بلا حبال
وكل يوم تركبن مثل الرحول
مشيتي سيده ولا فيها ميال
وقالت اركب واعتمر بي يالبطول
واسال الله ان يغفر ذنوبا اثقال
وبالمطاف الناس يطوفون حول
بيت رب البيت ربي ذا الجلال
الا انا من بدهم تقل مهبول
ما اطوف امشي من الذله عدال
ودق قلبي مثل دقات الطبول
لا حكوا بالسوق او جاله مجال
المواضيع المتشابهه 
فلــــــــــــها وربك يحلها ان شاء الله 
العرض الشجري
