قصتي مع عملية المرارة.......
 

بسم الله الرحمن الرحيم

والله ماكتبت قصتي وتجربتي الا لاني فعلاً لما كنت في المستشفى وكنت ابحث في النت
اي موضوع ابي اشوف احد مثلي وابي اعرف قبل وبعد العملية
ايش صار له بحكي لكم قصتي

بدائت معاناتي اول يوم رمضان حيث اني كنت مكثر في الاكل كبسه مع رز ولبن
وجاني الم بعد صلاة الفجر الم شديد في الجهه العلوويه جهة اليمين تحت القفص الصدري مباشره جاني الم شديد ورجعت الاكل لاني كنت احس بلوعة كبد ولا كنت اعرف السبب وبعد ماذهبت المستشفى عطوني مسكنات ارتحت وفيه دكتور قالي
هاذي مكان المراره يمكن فيه حرقان عندك ولا تلبك معوي وطلعت على اساس بسوي
فحوصات بس مرت الايام وراح الالم وصرت اقلل اكل والحمدلله الوضع صار اوك

ولكن في العشر الاوخر يوم الخميس كان فيه فطور عند واحد من الاخوان ذهبت اليه وافطرت فطووررر دسم وبعدها رجعت مره ثانيه وتسحرت كبسسسه وكثرت

بعد صلاة الفجر جاني الم في نفس المكان وكان اشد من الاول وقسم بالله يعصرك عصررررر ورحت للمستشفى وعطوني مسكن بس مانفع رجعو عطوني مسكن اقوى
من الاول وفعلن ارتحت بس شافني دكتور جديد وقالي هاذا واضح انه فيه حصى عندك بالمراره لازم تروح تفحص قلت خلاص بروح افحص في مستشفى الحبيب الطبي لان المستشفى الحكومي يطول ويتاخر وفعلن لما رحت لمستشفى الحبيب
مباشره سوى تحليل اشعة سونار اكتشفو وجود حصى في المرار وبعدها سوى لي
اشعة رنين ونفس الشي تأكدو وجود حصى في المراره
قلت للدكتور عادي نفتت الحصى باليزر قال لا المراره مانقدر نفتت الحصى لازم تنشال المراره لان المراره جداره رقيق مو مثل الكلى الي يتفتت باليزر
انا من الالم الي فيني ابي ارتاح قلت له خلاص سوى العمليه ابي ارتاح :hawamer4412

وفعلن قرر اليوم الثاني يسوي العمليه طبعاً تصفحت النت وجلست ابحث في قوقل عن الي سوى العمليه لقيت شي كويس وشي مو كويس

الشي الكويس ان كثير سووو العملية وكلهم مبسوطين حتى لدرجة وحده مسويه العمليه كاتبه ان شلت المراره والحين جالسه اقول وش فايدة المراره دام انا ماحس باي شي وعيشه حياتي طبيعي انا هنا تفائلت :hawamer3112

لكن بعدها قريت شيء ضيق ام ام صدري لما سمعت ان 10 % من الي يسون عملية المراره يموتون اثناء العمليه جلست اوسوس وخفت خوووف مو طبيعي

ولكن اظاهر ان قصدهم العمليات القديمه الي شق البطن لان الحين مافيه شق بطن
الحين بس 4 اثقاب صغيره هاذي صورة العمليه بالمنظار والعمليه المفتوحه
http://www.sehha.com/diseases/liver/...ithiasis11.jpg

المهم فعلاً اجريت العمليه والعمليه استغرقت ساعه ونص

بس لما صحيت من البنج انا قبل العمليه كان عندي بلغم شوي

يوم قمت كان البنج منشف حلقي وكان فيني بلغم مسكر المجرى حسيت اني
ماقدر اتنفس كتمه وجلس اسوي اخخخخخخخخخخ اخخخخخخخخ :hawamer4112
نصيحه اذا فيك بلغم ولا مزكم لاتسوي العمليه لين تطيب

المهم بعدها رحت الغرفه وكان وضعي الحمدلله طيب بس ابي انام وفيه الم مكان العمليه خفيف
وكان الوضع طبيعي وكل شي تمام
المهم اليوم الثاني جاني الدكتور وشوف كل شي قال خلاص ابداء اكل عادي
وهاذا كان اكبر غلطه
نصيحه اذا قالك الدكتور اكل عادي اي شيء وخذ راحتك لاتاكل اي شي خلك على الشوربه والمويه فقط بسسسسس

طبعا انا قالي اكل والمستشفى صارو يجيبون لي فطور وغداء وعشاء من دايت سنتر
وصرت اكل عادي جداً

المهم يوم الخروج يوم طلعت كنت متغدي عادي

بس كنت احس بالم في وسط البطن

وطلعت رحت البيت الا وضعي بطني يوجعني واحس اني تعباااااااان
قلت يمكن تروح اليوم الثاني وكان معي امسسسسسسك اقوى شيء

المهم واجلس اشرب شيء يلين بطني عطتني الوالد كمون وعطتني انانااس
بس الوضع يزيد والالم يزيد:hawamer4412

الساعه 5 الفجر اليوم الثاني رحت على طول للمستشفى وسوى لي فحوصات
تخيلو وش طلع لي:hawamer4112

قالو لي معاك اصفار (( يرقان)) انزيمات الكبد مرررررره زايده عندك
سالتهم وش السبب طيب؟
قال دكتور لي يمكن يكون التهاب كبد بس مش عارفينه نوعه وتجلس الوساس تروح وتجي عندي واجلس افكرررر وش بيصير ومن وين جاء الفيروس الف فكره وفكره :hawamer4412
المهم وش لون طيب تعرفون وتتأكدون قالو لي نسوي فحوص
طبعاً خلال هالفتره كل اعراض اليرقان الاصفار عندي عيوني صفره والبول زي لون الشاهي احمررر
ولااقدر اكل ولا اشرب اي شي كنت عايش ع المغذي يومين بس كنها سنتين
من التفكير والخووووووف
بس اليوم الثاني لما طلعت النتائج ماحصلو فيه فيروس ولله الحمد
طيب وش منه ذا الي صار جاء الدكتور قال يمكن ثلاث اسباب
1- يمكن مادبسنا قناة المراره زين وهي الي سوت التهاب
2- يمكن فيه حصاه مسكره المجرى حق القناه المراريه
3-يمكن فيه جرح للكبد وقت العمليه

طيب وش الحل قال لازم نسوي فحوص جديده للرنين نتأكد بعد 5 ساعات
جاني دكتور الي يسوي فحوص الرنين قال مانقدر نسوي رنين لان الكلبس حديد
ويمكن يسوي مشكله لاحول ويضيق صدري ويكلمون الدكتور لين ماقال الدكتور
اصلن مادة الكلبس مصنوعه من ماده طبيه متأثر على الموجات

وفعلاً سوى لي الفحوصات طبعاً كان اليوم الثالث والحمدلله الالم وكل شي راح مني
بس كنت خايف جداً جدا من الاكل

المهم طلعت النتايج طلع مافيه اي شي من الاسباب الي قالها الدكتور طيب وش الي خلى يصير فيني كذا
قال الدكتور يمكن يكون فيه حصاه كانت عالقه وطاحت من نفسها وهي الي رفعة الانزيمات فتره
الحين ابدا اكل عادي
طبعاً ماسمعت كلامه وبديت بس اشرب شوربه ومويه شوي شوي
وفعلاً الحمدلله ارتحت
ولا صار شي وضبطت الامور

طبعا انا اتوقع ان الي صار لي كان غلطة الدكتور لما قال لي اكل اي شي
والمفروض الي مسوي مراره يعود الكبد شوي شوي على افراز الماده الصفراء
وياكل لمدة اسبوع اكل خفيف جدا جدا ويبعد عن الرز والبيض واللبن

لحد مايتعود الجسم وتضبط الانزيمات حقت الكبد

ترى مو كل شي يقوله الدكتور صح بعض الدكاتره مطفوقين
ولاتنسوني من الدعاء والله يشفي كل مريض وكل واحد بيسوي عملية

ماتعبت ولا كتبت ذا الموضوع الا لوجه الله وليستفيد اخواني

ومثل مايقول المثل اسال مجرب ولا تسال طبيب

وشكرا