تآآآبع البارت


ورغم مرور أيام على الكلام الي صار بينها وبين ندئ الا أنها ماقدرت تبعد ملامح فيصل عنها ودايما يخطر على بالها بس بصمت
قالت بحاول ومحد يدري وش بتسوي لها الأيام
ويوم الخميس كانت العائله حايسه ماتدري وش أتسوي
وصاروا يتجهزون يبون يروحون للعشا الي مسويه أبو سلطان ألي هو خطيب خلود
أبو سلطان رجل متقاعد وعنده ولدين وبنت وحده
سلطان :28سنه موظف حكومي وخاطب خلود
عبد العزيز : 27سنه مهندس معماري ومعجب بطيف من كثر كلام أخته عنها بس طيف ماتدري عن السالفه (دا مهندس أد الدنيا ياطيف) )
آمنه: 24سنه صيدليه مثل خلود ومتخرجه معها من نفس الجامعه
في غرفه خلود الي ماتدري وش اتسوي بروحها:
ها غيداء حلو مكياجي
غيداء ناسيه الدنيا لان تركي ناشب بحلقها ويراكض وراها عشان ترضى تجلس معه مايبي يروح عشان فيه مباراه بالليل
غيداء بدون نفس : ايه حلو على بالك بنروح عرس
ولفت على تركي الي يقول : الله يخليك غيوده لاتروحين أجلسي معاي عشاني
غيداء: والله خاطري مو زين ودي أروح اغير جو ( واقترحت عليه) ليش ماتطلب من طيف تجلس معاك
تضايق تركي اكثر : لا مابي ماأحب الناس المعقدين
ضحكت خلود وهي تعدل لبسها على المرايه : طيف معقده
تركي: وانتي هبلا
غيداء تضحك من قلب : ههههه والله تركي عسل ابد مايجرح بالكلام ، بس تكفى ياتركي تعذرني هالمره والله متضايقه
تركي : يعني مافيه فايده
غيداء : مع الأسف يا أخي العزيز
طالعها بألم وحقد بنفس الوقت وركض لانه حاس أنها بتركض وراه من الكلام الي بقوله
تركي عند الباب: غيداء أنتي حيوانه
غيداء أحتارت اكثر وكل الي سوته انها قالت : روح ياتركي ياولد سوير الله يسامحك بس الين ارجع.
خلود تضرب غيداء بكتفها : غيداء كذا تتكلمين عن امي
غيداء : بسم الله حرام ادلع أمي
أمهم من عند الباب: يالله يابنات عجلوا
خلود : خلاص يمه جاهزين
أمهم : وين طيف ياربي من هالبنت كل الوقت ماتبين
ردت طيف من وراها : ماراح اروح يمه
لفت لها أمها تسألها : ليه خير وش عذرك .. بسك دراسه وصكه روحي تونسي شوي .
طيف : ما أحب اروح لهم وش دخلني آهم شي خلود ..وانا بصراحه أنسانه اصدع بسرعه من العزايم ..
امها : خلاص كيفك مثل ماتبين آمري لله .
تركي يسحب عبايه أمه :وانا مابي اروح
امه : هاه وش عندك انت بعد ماتحب العزايم ..
تركي : اليوم مباراة الاتحاد ودي أشوفها .. الله يخليك يمه مابي آروح
أمه : خلاص ، يمه ياطيف أنتبهي لأخوك معك
تركي معصب : يمه لا عاد توصين أحد علي خصوصا أم نظاره
طيف : أقول اسكت لا أكشت فيك هالحين آنت وجهك ..
تركي : لا لا خلاص أنتي حبيبتي أنتي احلى طيف شفتها بحياتي <- نصاب
غيداء من بعد ماراحت تجيب عبايتها من غرفتها : أقول ضحكك مايمشي يابو الشباب بعدين بروح العشا وارد لك وبنتف ريشك ريشه ريشه

نزلت غيداء مع أمها وخلود وكان أبوهم يحتريهم بالسياره وعند الباب قالت خلود:
غيداء انا حلوه
بس مين الي رد غير تركي:
وع أتخرعين بسم الله بعدين الحقي كشتك مدري وش فيها كأنك طايحه بزباله.
خلود معصبه وبقوه وغيداء ميته ضحك هههههههههههههههاااااي
يمه اولدك هذا قليل ادب
أمها وهي تركب السياره : أحسابك بعدين أوريك ياقليل الادب هين يالسوسه.
غيداء من بعد ماركبت السياره :
باي يالسوسه ويارب الأتحاد يجيب العيد .
وبعد ربع ساعه تقريبا أوصلت عايلة بو نايف عند بيت أبو سلطان الي كان في أستقبالهم هو وولده سلطان وبعد عبد العزيز معاهم وراز وجهه كان على باله غيداء أنها طيف
رحب بو سلطان فيهم هو واعياله ودخلوا البيت ، جلسوا الرجال بالمجلس والحريم راحوا صالة الحريم من بعد ماستقبلتهم أم سلطان وبنتها آمنه.
كان الكل يعرف ان سبب العزيمه الي مسويها بو سلطان هي زيادة معرفه بين أهله وأهل العروسه الي هي خلود المهم ماكانت العايله بس على العشا كان معهم أخوان بو سلطان وأهاليم
وبعد العشا جلس الكل يسولفون وكانوا البنات جالسين بلحالهم الي هم خلود وغيداء وآمنه وبنات عمها
آمنه تكلم خلود: بصراحه ماراح أصدق انك بتصيرين زوجة أخوي الا الين أشوفك قدام اعيوني جالسه عندنا
خلود : بكره تملين مني وبذكرك
آمنه : ياويلي مستحيل أفكر بهالشي لأني حاسبتك أختي مو زوجة أخوي .
ولما سمعت بنت عم آمنه مريم كلامهم أنقهرت وصارت توشوش أختها مي :
أنا ودي أعرف سلطان وش عاجبه فيها ..؟؟
مي ترد بكل ضمير : والله بصراحه حلوه أنا اعجبتني حتى أخلاقها عاليه
مريم مقهوره: أقول ماعندك غير هالكذوب أنا ماشوف فيها زود أنا أحلى منها بكثير
مي : أكيد أنتي حلوه مايحتاج بس أهيا بعد حلوه بعدين لاتفكرين ان الحلاوه أهي الشي الوحيد في الارتباط ترى الحب هو الاساس
مريم :أقول أسكتي من هالفلسفه والهذره الزايده
مي : أبد ماتحبين الصراحه طيب وش رايك بأختها
مريم : يعني ماتبعد من آختها
مي : والله ماعندك سالفه بصراحه أهيا أحلى من خلود وهذا يفسر لك أن الحب هو أساس الارتباط مو خرابيطك.
وأزهقت مي من حكي أختها فقامت وراحت تجلس جنب غيداء الي كانت ساكته وتسمع حكي خلود وآمنه
ولما جلست جنبها مي أبتسمت لها غيداء أبتسامه رضا وراحه بنفس الوقت واول ماقالت مي :
ليه الحلو ساكت ؟
جاوبت لها غيداء بعد ماعدلت وضع جلستها
لا أبد سلامتك
مي : ان شاء الله تكونين مبسوطه
غيداء : اكيد بشوفتكم أنا مرتاحه
مي : تسلمين من ذوقك والله ، قالت لي آمون أنك تدرسين بالجامعه
غيداء: اي والله أنا سنه ثانيه أدارة أعمال وأنتي
مي: لا أنا متخرجه من كلية التربيه بس ماتعينت الا هالحين
غيداء: ماشاء الله عليك بالتوفيق و.... ( ما أمداها تكمل كلامها الا بجوالها يدق وعرفت مين . واكيد أنتوا بعد ) على بالي شرين
شالت جوالها من شنطتها وردت بكل هدووء على غير عاده بس من الأزعاج ماقدرت تفهم من كلام ندى شي:
يالسحليه والله مدري وش تهذرين
ندى: غيري المكان طيب بعدين وش هالأزعاج أنتي برى
غيداء : أيه
أثناء أتصالها حست آمنه انها ماكانت تسمع عدل فقامت ودلتها على غرفه قريبه عشان تكلم براحه
غيداء: هاه ندى هالحين تسمعين زين
ندى : اكيد يالبطه بس ماقلتي لي وينك بالملاهي
غيداء : أي ملاهي أنتي وجهك أمداك تنسين .
ندى : آه تذكرت عند أهل خطيب خلود . هاه كيف الاجواء وناسه
غيداء : أي والله تمنيتك معاي
ندى : بالعرس ان شاء الله . خلاص غيوده اكلمك بعدين لما تفضين
غيداء : أوكيه يالله باي
ندئ : بايات يالبطه
أنتهت المكالمه ولما قفلت غيداء الخط ومشت تبي ترد عند البنات أنصدمت من الشاب الي كان واقف على الباب وابد ماحست بوجوده ولا تدري من متى وهو واقف بس كان يراقبها أثناء الأتصال
أنجنت من الخوف وماعرفت وش تسوي فركضت وتخبت ورا الستاره وصارت تنادي آمنه بأرتباك
حس الشاب أنه ضايقها بهالتصرف البايخ واعتذر منها ورجع للمجلس قبل ماتسمع آمنه صوت غيداء
دخلت عليها وهي تسمي لانها كانت تسمع صوتها بس ماشافتها وشوي أطلعت من ورى الستاره والخوف بعيونها
آمنه بأستغراب : خير وصار أقلقتيني .
ماقدرت غيداء تقولها على السالفه وعن الي كان يراقبها عند الباب
غيداء: لا شفت أحد مر من هنا الظاهر كنت أتخيل بس
آمنه : ولا يهمك . (وسألتها ) هاه خلصتي مكالمه ولا بعد.
غيداء ترفع شعرها عن وجها الخجول : إيه خلصت مشكوره
آمنه أمسكتها بيدها وودتها وهي تقول : وش دعوه للشكر حنا خوات .
لما أرجعت غيداء لمكانها كان أمبين عليها الأحراج وحست خلود انه صار لأختها شي بس ماحبت تسألها قدامهم فخلتها ألين يرجعون للبيت أحسن وعشان تفهم السالفه برواق
غيداء من بعد ماردت واجلست بوسط خلود ومي :
أعذريني لأني تركتك
مي : عادي ماصار شي . ان شاء الله خير
غيداء : الخير بوجهك . هاذي صديقتي بالجامعه حبت أتطامن علي
مي : يابختها بصديقه مثلك
غيداء : بجد أنتي تحرجيني بكلامك الحلو بس أنتي أحلى منه
مي : تسلمين على فكره ليكون على بالك اني أجاملك لا والله أنا جدا أحب الصراحه والي بقلبي على ألساني .
غيداء : هذا من طيبك وانا جدا سعيده لأني عرفتك اليوم
.
وبعد ما أنتهت السهره الحلوه والبسيطه ردت عايلة بو نايف لبيتهم بعد ماودعت أبو سلطان واهله وكان عبد العزيز واقف معهم ويراقب بهدووء حتى أبتعدوا عن المكان فقام يركض بسرعه لغرفة أخته آمنه الي كانت تلف شعرها على المرايه
عبد العزيز : ليمون ،، ليمون ( عبد العزيز يحب يناديها كذا دايما فصارت عاده عنده)
آمنه : خير وش فيك خرعتني
عبد العزيز: أخيرا شفتها ما أصدق وش هالحظ كان قلبي حاس
آمنه تجاوبه بأستغراب : مين شفت مافهمت عليك ؟
عبد العزيز: طيف مين غيرها
أستغربت أكثر : طيف مين طيف
عبد العزيز: ياويلي هالبنت بتجنني طيف بنت أبو نايف وعشان تفهمين اكثر أقول طيف أخت خلود خطيبة سلطان وزوجته بعد عدة أشهر .
جلست على طرف سريرها وهي متأكده من الي راح تقوله:
بس طيف ماجات معاهم اليوم قالوا مشغوله
جلس جنبها وهو بنفسه مستغرب هالمره ويأشر بيده: أجل من ذيك الي شفتها
آمنه: وين شفتها ( وبحلقت فيه بقوه) عزوز أنت تلعب من ورانا
عبد العزيز: لا وش هالكلام الفاضي ، بس كنت ابي اجيب شغله فجأه لقيت ملاك قدامي .
بهالحظه وضحت السالفه لآمنه وتذكرت غيداء لما لقتها منخشه ورى الستاره بالغرفه
آمنه : آه عرفت هالحين مين تقصد . بس يالحبيب هاذي الي شفتها مو حبيبة القلب
عبد العزيز منقهر ويرد من غير نفس : أجل مين ؟
قامت من جنبه وهي تضحك على شكله وحبت تلعب بأعصابه شوي
آمنه : غريبه في أحد مايعرف بنت عمه
عبد العزيز: بنت عمه روحي زين على بالك مو حافظ أشكالهم
آمنه : الناس يتغيرون ، تقدر تقولي متى آخر مره شفتهم فيها .
عبد العزيز مصدق السالفه : من زمان ، بس معقوله عندي بنت عم كذا طيب مين ؟
آمنه : هاذي مريم بنت عمي محمد
عبد العزيز: أقول روحي زين والله لو تجلسين تحلفين لي لبكره ماراح اصدقك
آمنه : اوكيه كيفك أنا قلت لك مين وانت بكيفك تصدق ولا ماتصدق
وجلس عزوز محتار ومو قادر يصدق معقوله هاذي مريم هو عارف انها حلوه بس مو بالطريقه الي شافها فيها كانت بجد بجد حلوه وأطير العقل وصار يكلم نفسه ولا أنتبه لما دخل سلطان عليهم
سلطان : هاه كيف شفتوا الحلوين اليوم
آمنه : الحلو حلو وش نقدر نقول
وركز سلطان على عزوز الي بعالم والناس بعالم
سلطان : وش فيه هاذا كذا
آمنه : ماعليك منه الظاهر ماتعشى زين
سلطان : ترى أعرفه ماراح يخلي احد ينام أذا كان جوعان هذره طول الليل ، جيبي له شي يآكله
آمنه : هههههه عزوز تبي تاكل شي
عزوز: أقول ليمونه...
سلطان : ههههه أقول جيبي له ليمون
آمنه : عزوز وش فيك
عزوز : تكفين تقولين مين؟ طلبتك
سلطان مو فاهم شي من السالفه وآمنه ماحبت تحرج عزوز قدامه
آمنه : خلاص بفهمك بعدين بس ممكن تتفضل من غير مطرود من غرفتي أبي ابدل.
خرج عزوز من بعد ماأخذ وعد من ليمونه أنها تقوله بعدين .
سلطان يسأل : وش السالفه فيه شي امخبينه عني
آمنه : وش بنخبي عنك يعني كأنك ماتعرف عزوز ولقافته
قام سلطان وغير الموضوع بس واضح عليه الاهتمام هالمره : المهم قوليلي شخبار خلود يارب تكون طيبه
آمنه: لا أبشرك أنها طيبه وتسلم عليك بعد .
سلطان : الله يسلمها ويسلمك
آمنه : طيب ممكن أبدل يا أخي العزيز تراكم أزعجتوني بالأسئله . أنت وعزوز
سلطان : لا خلاص بروح أشوف وين المهندس وانتي خذي راحتك بالأذن
وأخيرا أقدرت تخلص آمنه من لقافه أخوانها فواحد يسأل عن خطيبته والثاني مايدري وين الله حاطه بس جالس يفكر بالملاك الي شافها وباقي عنده شك أنها ابدا مو بنت عمه مريم . بس شكك ياعزوزي بمحله لأنها غيداء أخت طيف (وش أتهقون بردة فعله لما يدري بالسالفه) بنشوف

خلونا نروح نشوف حال غيداء صاحبة الشأن وهي تحكي السالفه لخواتها وهم جالسين بغرفه طيف الي جلست تداري تركي الولد الحليوه من بعد ماخسر الأتحاد حتى نام على سريرها .
غيداء تتكلم بقهر : أقولكم كان واقف على باب الغرفه وماشفته وكان يراقبني وانا ما أدري ( وصارت تلوم روحها ) مالت علي ثوره ما أنتبه ابد
طيف : صدق دلخه ،(وسألتها ) وش سويتي طيب
غيداء: وش سويت أنحشت من الخوف وأنخشيت ورى الستاره على بالك سوبر مان بطير..
خلود : ههههه طيب يمكنه سلطان حبيبي على باله أنا.
غيداء : حبتك بعارين أنتي وياه لا مو هو الظاهر أنه أخوه ،مدري وش اسمه بعدين سلطان يلوع الكبد هذا آحلى منه ؟
خلود : لو سمحتي لا تتكلمين عن زوج المستقبل بهاذي الطريقه ..واخوه اسمه عبد العزيز
غيداء .. روحي زين آنتي وخروف المستقبل ..
طيف : وش عنده يراقبك وبعدين كان صرختي بوجهه عشان يحترم نفسه ثاني مره .
غيداء : ياكثر الكلام ،أقولك خفت وماعاد عرفت وش اسوي بلحظتها.
خلود تتكلم بقهر : آه لو كان الي في بالي .( مين الي في بالك ياخلود غير فيصل ))
غيداء تركز فيها وتسألها : مين تقصدين ؟
طيف : ههههه والله وانا مثلك كان شفتي الحال غير الحال .
خلود : قصدك كان تقطعنا من الفرحه ههههههههههاااااااي
طيف : هههههههههااااي
فهمت غيداء قصد خواتها وبلحظتها تذكرت كلامها لندى وتمنت أنها معاها تسمع .لانها كل ما حاولت تنساه ذكروها فيه وصارت مهمومه اكثر.
غيداء بحزن يتخلله ألم : صدق ماعندكم سالفه بايخات .
خلود : ههههه حنا نمزح معاك وش دعوه تزعلين كل مره .
غيداء : أوكيه ماعندكم سالفه غير هاذي لأنها حيل تكدرني .
طيف : خلاص ولا يهمك . بعدين كنا نمزح مثل ماتفضلت الأخت خلود من أشوي . بعدين نسيتي أخوي نواف لما كان يعايرني بولد جيرانا ذاك الأهبل خميس ولا كنت أزعل ، الله يذكرك بالخير يانواف بجد وحشنا .
تذكرت غيداء السالفه وضحكت رغم الألم الي بقلبها بس شقاوة نواف ونستها اكثر ، وتركي تراه صوره مصغره عن
نواف في كل شي .
خلود : أي والله وحشنا الله يرده لنا بالسلامه
طيف : أقول قصري حسك ترى أذا اسمعتك أمي سوت لنا سالفه .
خلود : عادي مو ولدها
طيف : ادري ياغبيه بس تبينها تجلس تبكي طول الليل حرام عليك .
خلود : لا والله ماتهون علي أم نايف .
غيداء : بالأذن بروح غرفتي ( أكيد متكدره) أعرفها زين.)
طيف : بدري ياحلوه .
غيداء : تستهبلين حضرتك. . بعدين آنا حلوه غصب
طيف : وش دعوه فيه أحد يستهبل على غيداء مستحيل أصدق .
خلود : خلاص خليها تروح وانا بعد بروح غرفتي ( وطالعت لتركي الي كان غاط بالنوم ولا على باله ) لاتنسين تودين تركي غرفته .
طيف : أنتي من جدك أنا أشيل تركي تبين روحي تطلع خليه مكانه للصبح الا أذا حبيتي تسوين معروف وتشيلينه أنتي ، بعدين لا تنسين أنك بيوم من الايام بتصيرين أم تدربي من هالحين بتركي يلا همتك .
خلود : عادي بشيله وش فيها .
وقامت وشالته لغرفته وراحت بعدها لغرفتها مثل ماسوت غيداء ألي كانت تفكر بالموقف البايخ الي صار لها وما كانت تدري ان عزوز هام فيها وما قدر ينام بذيك الليله من كثر التفكير والحيره وأنقهر أكثر لما نامت ليمونه وخلته محتار مين البنت الي شافها..
.
أما غيداء من بعد مادقت السالفه لصديقتها ندى عن طريق الرسايل ‏ كالعاده كل يوم نامت وبكل هدوؤء ومافي بالها غير فيصل . .
&&&&&&&&&&&&&&&&&&&&&&&&&&&&&&&&&&&&&&&&&&&&&&&&&& &&&&&&&&&&&&&&

بحديقه بيت بو نايف .
كان تركي يلعب كوره ومتشخص يحتري جيت أخوه نايف هو وزوجته وبنته من القصيم وغيداء وخواتها كانو ا بالمطبخ يساعدون أمهم .
طيف : غيداء شوفي الكيكه أستوت بالفرن
غيداء ولا على بالها : أقول هي كيكه أمي ولا أبوي مو أنتي الي مسويتها . صدق طرار ويتشرط
طيف : لا حول لله ابد مافيك فايده
قامت بعدها بحماس : الا فيني . (وركضت عند باب المطبخ وقالت) بروح ألعب مع تركي كوره .
بس ما أمداها تخرج حتى أسمعت جوال أمها يدق
أمها تكلم شغالتهم : تاريني جيبي جوالي من على الطاوله.
بس خلود كانت قريبه منه واقدرت تقرأ أسم المتصل :
يمه ،، هذا فيصل ولد خالتي .
سمعت غيداء كلام خلود وتمت واقفه جنب الجدار بس محد حس بوجودها على بالهم راحت عند تركي بالحديقه مثل ماقالت
وشهقت لما سمعت آسمه و قالت بهدوؤ (فيصل)
أم نايف أول ماردت والسعاده بعيونها : هلا والله وغلا بفيصل حبيبي .
فيصل :من بعد ماسلم .. خالتي شلونك عساك طيبه والله وحشتيني مووت.
خالته : أنا بعد أكثر يايمه والله اني دايما أسأل عنك ولما ادق ألقاك مقفل الجوال ، خير عسى ماشر.
فيصل : الشر مايجيك ، أبد كنت بدبي ماقالت لك الوالده.
خالته : ايه نسيت يايمه أتحمد لك بالسلامه ، أعذرني من فرحتي بصوتك نسيت كل شي .
غيداء تهمس لروحها (فيصل بالسعوديه ،يعني رد من السفر وأقول وش ذا النور))
فيصل : لا بجد ماقدر على كلامك الحلو . تدرين دايما اكلم واحد من أصدقاي عنك أقول عندي خاله يغارون منها الصبايا حلوه وكشخه ومثقفه لا وماخلت بلد الا ماراحت ماشاء الله عليها .
خالته تمزح معه : بس أنشاء الله خبرته اني مرتبطه أخاف يتقدم ويطلبني من أهلي.
فيصل : هههههه تبين الصراحه أنصدم لما عرف أنك جده قعد يسمي عليك .
خالته : الله يوفقك يايمه قل آمين ، بس وينك هالحين ؟
فيصل : آمين ربي يسمع منك ، وأنا بجده هالحين وتني جاي من الطايف .
خالته : بجده ، عاد لا أوصيك لازم تحضر عرس خلود بنتي .
فيصل : ولو مايحتاج تقولين لي هذا شي أكيد مايحتاج توصين خلود مثل آختي .. .
خالته : يعني أعتمد كلامك. ياويلك مني أذا ماشفت وجهك .
فيصل : لهاذي الدرجه تحبيني .
خالته : أي والله أحبك مو ولد أختي ، أكيد بحسبة أولدي.
فيصل : فديتك والله ياخالتي ، والله يوفق خلود أن شاء الله.
خالته : الله يسلمك وعقبال ما أفرح فيك.
فيصل : عن قريب أنشاء الله.
خالته : والله ياليته ألف مبروك ومين هاذي الي أمها داعيه لها.<<( أنا أشهد أن امها داعيه لها)
سمعت غيداء كلام أمها فوقف قلبها من الخوف وحست من كان يقصد أكيد البنت الأماراتيه ألي سمعت عنها قبل كذا .
،،،،
أحبكـ كلمه سوت على جدار
الخفوق نقوش...
أحبكـ دمعه سالت على خدي
تواسيني ...
أحبكـ في زمان كنه دروب
مظلمه ووحوش..
أحبكـ رعشه بجسمي إذا لحالي
تخليني ..
أحبكـ ماهي بعطر على كتاب
الشعر مرشوش ...
أحبكـ خنجر بصدري وإذا شلته
يأذيني ...
،،،،،
فيصل : بعدين أخبرك مو هالحين.أقصد بخليها مفاجأه لك.
خالته : أن شاء الله خير.
فيصل : أوكيه ياخالتي أكلمك وقت ثاني أنا أدري أنك تحترين جيت نايف وأمجاد لاني من شوي كنت آكلمهم وصاروا على وشك الوصول .
خالته : خلاص يمه بحفظ الرحمن سلم على أمك كثير .
فيصل : يوصل أنشاء الله يلا مع السلامه .
خالته : هلا والله مع السلامه.
أنتهت أم نايف من المكالمه واهيا مبسوطه عكس بنتها غيداء الي غيرت رايها فبدل ماتروح للحديقه راحت غرفتها والدموع بعيونها وحاسه بقهر لانها من كل قلبها تحبه ولا شكت بحبها له وبعد كانت متأكده أنها أذا حبت حبت من قلبها مهما كان .
في البدايه ماكانت تهتم فيه لانها من زمان ماشافته بس من سنه تقريبا شافته ببيت جدتها بالشرقيه وماصدقت أعيونها لما شافته على بالها تحلم لانه كان صوره طبق الاصل من فارس احلامها الي طول حياتها تتخيله .
من بعد ماشافته أنهبلت بجد وما قدرت تصدق اعيونها ومن ذاك اليوم كل شي بدأ. التعليقات، والأهتمام ،وسماع الأخبار عنه وأكثر من هذا كله الحب الذي أنولد بقلبها من تلك اللحظه بس محد قدر يحس بمشاعرها وأحاسيسها الا ندئ الي ساندتها بصعب لحظاتها وما زالت بس تعتقدون راح تسمر ندئ مع غيداء ؟

كل هذا راح نعرفه شي أكيد بالأجزاء الجايه أنشاء الله

نهاية البارت