صرخت عمشاء – انتي تبين تفضحينا

جلست ريم جنبها وضمتها – خلاص ياموضي خلاص

موضي ودموعها تنزل وبشهاق – كيف أخذه كيف وعيالي عيالي ياريم

عيالي بيردون هالحين مع ابوي ومايلقوني وش بيقولون امنا اعرست راحت

خلاص

عمشاء – عيالتس محفوظين ومحمد ولد عمتس اللي لو تلفين الدنيا ماتلقين

اللي أحسن منه منصب وزين ومرجله وفلوس

ريم تضمها وتواسيه وتدمع معها – لاتخافين ياموضي على عيالتس

انا امهم اللين تأخذينهم لبيتس لاتخافين

موضي وهي تبكي وبشهاق – بس ماأبيه ماأبيه

دخلت الشغاله وهي تقول – ماما عريس يجي وفهيد معه

عمشاء مطت عيونها – حسبي الله عليتس رجلتس جاء ودموعتس اربع

اربع قومي عدليها ياريم وانا بروح ألهيه شوي

ركضت ريم للتسريحه وخذت المكياج وعدلت موضي اللي كارهه اليوم

كله .. سمعوا زغاريت امهم وتلآلي – كللللللللللللللللللللللللوش

بعدت ريم عن موضي وتغطت بطرحتها وعدلت عبايتها .. دخل فهيد

وجنبه محمد ووراهم عمشاء بالدخون ,, وهي عضت شفايفها بقوه

اتجهه فهيد وحب راسها – مبروك ياموضي مبروك

عمشاء – يالله تجمعكم على خير وانا امك منك المال ومنها العيال ويرزقكم

ربي الذريه الصالحه

من قالت ذريه كش شعر جسمها

وقف جنبها ولاناظرها ابد .. كانت لابسه فستان ازرق قريب من اللون البحري

مثل تصاميم المصمم هاني البحيري .. رفضت تلبس فستان ابيض وهن

سكتن عنها واحترمن رغبتها خصوصا انهم كلهم متزوجين قبل

بعد فتره من الجلوس وهو ولا رفع عينه لها ,, وهي منزله راسها

سمعته وهو يوقف ويقول – يالله مشينا

بصعوبه قدرت توقف ,, وريم اتجهت بسرعه وجابت عبايتها

بصعوبه لبست عبايتها وهي تحس إن معها هبوط في ضغط الدم

وبصعوبه قدرت تتبعه و تمشي وراه وامها تمشي معها هي وريم

عمشاء وبحزن – هالله هالله وانا امك في موضي

محمد وهو يتجهه لباب السياره من جهتها ويفتحه وبغموض – لاتوصين

ركبت بخوف ورجفه وهي تحس اطرافها جمدت

وقبل لايفتح الباب حقه ويركب .. اعترضت سيارتهم سياره نورها قوي

بقوه .. وباين إن مصيبه كبيره معها