( البـــــــــــارت الثانيـ عشــــــــــــ 12 ـر )



في بيت ضاحي بن فهيد


دخل البيت .. وشافته شيخه اللي ماراحت للعزيمه وهي تحتريه في قلبها يرقع كلام لازم يسمعه


ماإن وقف سيارته إلا هي موقفه في وجهه وهي تقول – اسمع انت


صقر نزل وسكر الباب بقوه وناظر فيها – انتي ليش مارحتي للعزيمه !!


شيخه انقهرت انه ماأهتم للسالفه اللي بتقولها – انا طالبه مئة ألف ليش عطيتني ثمانين


صقر تكتف وهو واقف ولف رجل على رجل – طيب قوليلي وش ناقصتس عشان اعطيتس مئه


شيخه بقوة وجهه – ابي أأمن مستقبلي انا وخواتي


صقر اعجبته صراحتها – اعجبتني صراحتس صراحه ,, بس ليه ماقلتي لأبوي هالحكي



ليش تطلبينه مني انا ( اعتدل في وقفته ) – بعدين انا ابي اعرف هالحين اللي ينكتب كتابهن يستحن


اما انتي كل ساعه وانتي مدقره قدامي ( ناظرها بخبث ) – لهدرجه مو مصدقه اني تملكت عليتس


شيخه خلاص إنبير القهر وصل حده عطته ظهرها – العشرين الباقيه تجيني وتعاملي بيكون معك


انت اللي ملزوم فيني مهب ابوك وبعدين انت اللي حفيت عشان تأخذني تحمل مايجيك ( وراحت وخلته )


تحت نظرات صقر الغاضبه .. وده لو يلحقها ويمردغها بالعقال بس مو مصبره غير مصير الحي يتلاقى


ويطلع عوابتها من عيونها اللي لها نظرات تدل على إنها أقوى إمراه واجهها في حياته












في المكتبه


عطى الأوراق العامل يصورها .. وطلع عند الباب يناظرها .. مايقدر يخبي خوفه عليها مهما كان


تظل بنت عمه ومحسوبه عليه ,, طلع البلاك بيري وجلس يطقطق في البي بي لين ناده العامل


أخذ الأوراق وركب – اسف تأخرت شوي


ماسمع لها صوت .. استحى يلف راسه – هيه


سمع صوتها يوم شهقت ,, بسرعه لف راسه وشافها تعرك عيونها من ورى البرقع .. كتم ضحكته


اظاهر كانت نايمه وخرب عليها


حب يغلس عليها شوي – اظاهر تحبين في هالدنيا ثنين


هند بفهاوه – هاه


فارس وهو يضحك – الأكل والنوم


هند اعرفت انها يسخر منها – ممكن تردني للبيت واحترم اني بنت عمك وعيب اللي تقوله


فارس اختفت ضحكته ,, عرف انها زعلت منه – آسف عمتنا هند عدي لين عشره ونوصل للبيت


هند انقهرت منه وأسكتت











في الملحق \ بيت ضاحي بن فهيد


نوره انهبلت منها – لا شويخ منتي بصاحيه


شيخه وهي جالسه بتوتر – اسكتي نوره ماني بفاضيتلس


وضحى اللي لابسه جلالها وبرقعها واقفه عند الباب وبهم – ماأدري وين راحت تأخرت هي وجدتي


ساره اللي جالسه وتشرب مويه .. وتفكر في سالب العقل والروح وسرحانه


نوره انقهرت من برود وضحى في اللي بتسويه شيخه – وضحى سمعتي اختس شقالت


وضحى دخلت وجلست – وش تبينا نسوي يانوره في اختس اللي تبيه بتسويه قبلنا ولا ماقبلنا


شيخه عصبت وناظرت في نوره بنص عين – اظاهر مابقى غير الصغار يحاكونا بكيفي بطلب منه


مئه انتي شخصتس


نوره اللي جلست جنبها – خصني انتس بتفضحينا بيقول بنات ناصر داخلات على طمع


شيخه نفثت على صدرها – اخوتس يااختي وش داخلين على طمع تراه هو اللي يبيني ماحفيت ادوره


وضحى – المهم خلونا من هاذا كله متى بتجهزين عرستس بعد اسبوع


شيخه ناظرت في وضحى – وش جهازه يخسي اشتري جهاز من بقابل ياحسره صقيران راعي الابل

والمقانيص


نوره مطت عيونها – دخيلتس ياوضحى الحقي فضايح فضايح في ذمتس تقولين الصدق


شيخه ناظرت فيها بنص عين – لا اتسذب متى ماتكلمت بجد انا يانويروه