صرخ وهو ماسك راسه –لاااااااااااااااااااااااااااااااااااااااااااااا
انفتح الباب بسرعه ووقف بين يدينه يصحيه ويهزه – ياولدي سلطان سلطان
سلطان اللي صحى وهو يشهق من الخوف وحبات العرق مليانه في وجهه
وشعره ودقات قلبه سريعه ومتملكه الخوف والرهبه – آه آه
ناظر في حمزه اللي كان حمزه يناظره بخوف – سلطان ياولدي وش فيك
سلطان ناظر جنبه ولقى كوب المويه شرب كل اللي في الكأس .. وقام من
مكانه وجلس على الكنبه وهو يدمع – عمي انا تعبان تعبااااااااااااااااااااان
حمزه مشى لين وصل جنبه وجلس عنده – شفيك ياولدي
سلطان – ماني قادر انسى اللي صار ماني قادر ( ونزلت دموعه وهو يتذكر)


قبل اربع سنوات وقليلآ من الوقت بالضبط
في غرفة سلطان
صارخ عليها ونفضها بقوه – انتي قد اللي سويتيه
العنود بقوه – ايه قده
نفضها بعصبيه وبإحتقار – وتقومين تصرخين على أمي هااااااااااااااااااااه
العنود دزته عنها – أمك هاذي حيه من تحت تبن تحرضك علي في كل شي
وقف في وجهها وصفعها كف وبحسافه – انتي من وش مخلوقه أمي اللي
أكرمتس ورفضت دخولتس المطبخ أمي اللي شالتس على راسها ورزتس بين
جماعتنا أمي اللي ماعدتس غريبه بينا ومن بعيد وحطتس بنتها بس تدرين
العيب فيني أنا اللي تحديت هلي عشان أخذتس ولا أنتي من يفكر فيتس
ويناظرتس روحي انقلعي أنتي طالق
العنود تكتفت – فرقاك عيد اصلا من حلاة هلك وربعك كلهم هيالق وبدو
متخلفين وانا حتى مايشرفني اعيش بينكم وبرد للدمام فديتها
سلطان ضحك بسخريه – تدرين اني ندمان قد شعر راسي اني انتشلتس من
عالمتس الوحل وعيشتس في مكان ولا عمرتس في يوم حلمتي فيه
( وطلع وخلاها وهو يعض على شفايفه قهر من هالحقيره اللي سبته وسبت
هله وأمه وربعه )


في الليل
دخل البيت وشافها جالسه وتبكي عند أبوه وأمه
عصب وأنقهر – هاذي لين هالحين هنيا
أمه تحاول تهديه – سلطان ياولدي حرمتك رفض اخوها يجي يأخذها
سلطان مقهور – ماينلام رجال عارف وخابر بعلوم أخته
أبو سلطان – سلطااااااااااااااان
ام سلطان شيخه – ودها لأهلها ياسلطان
سلطان منقهر منها ومعصب – تخسي ويحرم علي أوديها هي هانتنا وهانت
حتى عربنا وأنتقدتهم خليها تنقع عسى الله لايردها ( وراح وخلاهم )



في الصباح
صحى مالقى لأهله أثر ولاحتى للعنود زوجته .. سأل الخدم ماعندهم خبر
وسأل العم حمزه وخبره انهم الصبح ماأصبح توجهوا للشرقيه يودونها
لأهلها
حاول يتصل فيهم ولا أثر ولأحد رد عليه فيهم .. وقام يكرر المحاولات
لين وصلت الساعه أحدعش الضحى وصله خبر أنهم سووا حادث قريب
من الدمام وماتوا كلهم في الحادث
من بعدها صابته عقده نفسيه .. أحساس بالذنب وأنه هو المسؤول الأول عن
اللي صار لأهله .. ليتني اللي رحت ولا راحوا ( كان يصرخ بهالكلمه طول
فقدانهم عنه)
صرخ بقوه – ليتني رحت ولاراحوا ليتني رحت ولاراحوا أكرهها أكرهها
اكرههااااااااااااااااااااااا
حمزه أرتبك ومايعرف وش يسوي ركض للحبوب اللي عند راسه .. وطلع
الحبه اللي حفظها صم من كثر مايجيبها له من الصيدليه .. وفك الحبه وجاب
كوب الماء وركض له .. حط الحبه بالغصب في فم سلطان اللي يصرخ
وشربه المويه ,, وحط الكوب على الطاوله وحط راس سلطان على صدره
وقعد يقرأ عليه وينفث بالأيات لين هدى ورقد على كتفه













الصباح \ بيت سعد بن فهيد

دخل ضاحي البيت وعيونه من تحتها سواد من السهر في المستشفى .. عقبه
الشرطه اللي فتح تحقيق للي صار
قابلته موضي – صبحك الله بالخير
ضاحي – صبحتس الله بالخير
موضي تناظر فيه – من وين جاي ؟
ضاحي – من الشرطه وين أبوي
موضي – سرح هو وجدي للأبل ليش صاير شي
ضاحي – لا أنا بروح أرقد قولي لأمي لحد يصحيني للغداء
موضي وهي مستغربه من وجهه – ضاحي وانا اختك صاير شي
ضاحي – لا بس متهم خطير عصابته خلصت عليه ( وراح للدرج ) انا برقد
تعبان إذا صحيت إن شاءالله خبرتكم
موضي وهي تهز كتفها – براحتك
















في بيت ضاحي بن فهيد \ الصاله
صاحيه من بدري .. وخلت وضحى تصلح لها القهوه .. وجالسه بين بنات
ناصر وتحكيلهن عن ابوهن وشجاعته من هو صغير ومنيره وابو محمد
جالسين معهم
نزل سعد بلبس الكابتن الطيران وشنطته بيده – السلام عليكم
الجميع – عليكم السلام ورحمة الله وبركاته
سعد ناظر في بنات عمه وحب يحيي فيهن – حيالله بنات عمي بيتنا منور
البنات سكتن
شيخه وهي تلف رقبتها عنهم – وين النور وأخوك التيس فيه
من طرت هالكلمه إلا وهو نازل – السلام عليكم
شيخه وقفت .. وطلعت تاركتهم
صقر وهو رافع حاجب ورافع صوته – إذا حضرت الملائكه ذهبت الشياطين
الجده رخته بعصاها ,, قمز مرتاع – بسم الله علامتس
الكل كتم ضحكته ووضحى وخواتها افرحن بحركة الجده اللي
قالت – ماشيطان غيرك
صقر ترك الجده وهو مقهور من تصرفها .. وطلع يتبع شيخه فيه موال
في راسه
سعد اللي قرب وسلم على راس ابوه وأمه وجدته – تأمروني شي
منيره – لا سلامتك يمه مير ترفق وأنتبه الله يحفظك ياأبوي
ضاحي – وين رحلتك إله
سعد – يم مصر
منيره – ياعين ابوي طمني لمن وصلت
سعد أشر على خشمه – على ذا الخشم

















في الحوش
واقف قدامها – ليه معطاتس ابوي المهر
شيخه منقهره منه وبغت تقهره تكتفت – كم مهري
صقر حب التحدي اللي بينهم وتكتف مثله – هي الصراحه انتي ( وناظر فيها
من فوق لين تحت وركز عند مناطق معينه عشان يغيضها .. اللي من شافت
ناظرته وين وقفت ألتفت بشرشفها زين وتعدلت .. إبتسم بسخريه عشان
يقهرها ) – تستاهلين ثلاثين بس انا كريم وعطيتس ثمانين
شيخه بتحدي واضح وعطته ظهرها لانها استحت من نظراته اللي مركزه
فيها حتى من عقب ماألتفت في الشرشف – وش هو ثمانين بلّها واشرب
مويتها أبي مئة ألف
صقر اللي لف لين وقف في وجهها وركز عينه في عيونها وضحك – قويه
مئة ألف ( عدل ملامحه ) تحلمين بالمئه أنتي
شيخه عصبت – وليش أحلم فيها هاه علمني وش ناقصني أنا
صقر اللي يتكلم بنفس إسلوبها – ناقصتس والله قص في ذا اللسان اللي
مافيه حرمه تحاتسي رجلها بذا الإسلوب اللي لتس
شيخه وعطته ظهرها وهي تمشي للملحق – انا أعطي كل حد على إسلوبه
وهاذا معدن إسلوبي لك
( ركض يبي يمسكها بس قرعت بالباب بوجهه بقوه )
صقر – وين بتروحين هاه مصير الحي يتلاقى وانا وراتس والزمن طويل
يابنت الهنديه