الموضوع للشباب فقط ولا مانع من دخول المتزوجين
لكن يجي متزوج ويقول بالعكس وتحصله احسن عيشه عايش هذا لانه متزوج
ويدخل مجمعات ويقضي سهرات مع مرته ويجلس يطقطق علينا
واتمنى من محبي والعاملين بالهيئه العامه للسياحه والتراث الوطني لايدخلون الموضوع
كفايه نفاق !!
موضوعي هو الملل في نهاية الاسبوع وخاصه في اغلب الشباب
بعد اسبوع عمل اما دراسه ولا عمل تحصل الشباب ما عنده مكان يقضي وقته
صحيح في استراحات مع الشباب لكن الاستراحه موب كل يوم مفتوحه
واصحاب الاستراحه بعضهم تزوج والاخر ظروفه وعزايمه واشغاله
اذا المجمعات 99% عوائل ولا في اماكن شبابيه ولا فعاليات
ولا شي يفتح النفس هنا
عكس لو عندنا سينما وعندنا مجمعات مفتوحه وعندنا رياضات وفعاليات مثل البلدان الاخرى
انا ساكن بالدمام ويمكن همي اقل من اللي ساكن بالرياض مثلاً
لانه الدمام قريبه منا البحرين نطلع سينما ومجمعات
لكن المصيبه ايام نهاية الاسبوع تكون زحمه الجسر يعني تجلس 3 ساعات واكثر عند الجسر
وفوق كذا نص اليوم راح ولا يمديك على سينما ولا تمشيه ولا عشى بسرعه بسرعه تكون
وافضل يوم ايام الاسبوع لكن حتى الوقت ضيق من طلعوك للشغل ساعه 4
الى دخولك للبحرين الى رجعتك قبل نص الليل وبكرا دوام الوقت سريع ولا يمدي
والله حاله بصراحه الملل يعم على جميع الشباب واعرف واحد من الشباب
نفس الحال يقول تعبنا واحنا نفرفر بالشوارع تقول شرطه سريه ولا نجلس بالمجلس ولا بالملحق ونلعب سوني هذة موب عيشه ابد
لو عندنا سينما كان افضل مكان لقضاة الاوقات
لايجي واحد ويقول السينما اختلاط ومادري ايش
كل الشعب السعودي بالبحرين وعمري ما سمعت فيه مشكله طلعت
وحتى اذا في بجانبك امراة تقوم بنفسها وتغير المكان مع رجلها والعكس صحيح
كلن يعرف الاخلاق هناك واغلبهم سعوديين اللي ما يطلع اخلاقهم الا بالخارج فقط مع الاسف
واذا تقول السينما بالفلم في مشاهدة مخله
لعلمك الافلام السينما بالبحرين تحت ادارة شركة عربية وفيها قص للمقاطع المخله
وحتى الكلمات لكن المصيبه يجيك واحد ويقول وش لك بـ افلام السينما حمل من النت
اقولكم نقطه ان الافلام بالنت حتى بالمواقع العربية 70% منهم
لا تقطع المقاطع المخله اللي تصنف فوق +21 والمصيبه ربعنا ومن حبهم للافلام ما تحصلهم في مواقع عربية
هذا اول الحين تطوروا بل وصل بهم التطور الوصول في اعلى المواقع العالميه
اما روسيا ولا امريكا وصينيه وغيرها للتحميل واعلى دقه للفلم
يعني الفلم كامل 100% بجميع مشاهدة
وسمعت خبر قبل فترة انه اكثر نسبه تحميل افلام
وايضاً طلب لأعلى سرعه للانترنت بالشرق الاوسط هي بالسعودية
انا اشوف بوجود السينما تقلل مشاهدة الناس ببعض المشاهد المخله
وتقل نسبه التحميل لكن اكيد طبعاً وجود السينما خساير لبعض الشركات
وأولها شركات الاتصالات وبالتحديد الاتصالات السعودية
عموماً هذا ليس موضوعي او مطالبتي بوجود سينما .
لكن نطالب بوجود اماكن شبابيه زي العالم وفتح المجمعات للشباب
واللي يتعدى حدودة قصوا راسه واتحدى ابن ادم يسوي شي بعدها
لكن نظام مشي حالك وحب خشوم ما يصحح اخطائنا
والمصيبه الشر يعم هنا .
البعض يقول الحين رح تزوج وفلها لكن بقولك موب اي واحد يقدر يتزوج
اذا انت عندك القدرة الماليه والمستقبليه الله يهنيك
لكن احنا نحتاج وقت لترتيب امورنا
وشباب اليوم موب سهل عليه الزواج اذا الرواتب ضعيفه
والايجار مرتفع والاراضي اسعارها نار والعيشه غاليه
المواضيع المتشابهه 
مـلـل فـي هـالـبـلـد فـي نـهـايـة الاسـبـوع لـلـشـبـاب !! والــــحــــل !!! 
العرض الشجري
