خـلـنـا نـرتــاح أتـعـبـنـا الـمــسـيـر = طَــوَل الـمـشـوار والـسـكـه وعــر
ودنـا نجـلـس عـلـى جــال الغـديـر = وانـتـمـتــع بـالـربـيــع وبـالــزهــر
ريحـة القيصـوم والشـيـح العطـيـر = تـنـعـش اقـلــوبٍ تـوطـاهـا الـكــدر
خيـمـةٍ بالـبـر مـفـروشـه حـصـيـر = تسـوى عنـدي فـلـةٍ وســط الخـبـر
شـب نـارك دامـنـا وقـت العصـيـر = بـهـر الـدلـه وقـــرب لـــي الـتـمـر
آه من جـرحٍ لجـا باقصى الضميـر = مايطـيـب الـجــرح والـدنـيـا قـهــر
والقـهـر لـصـرت محـتـاج لحـقـيـر = حاجـتـك عـنــده ولا عـنـهـا مـفــر
وانت مضطـرٍ ولا لك مـن مطـيَـر = هـــــذه والله قـاصــمــة الــظــهــر
يتـركـك تـمـشـي بـخــطٍ مسـتـديـر = لا قـضـى الــلازم ولا قـــدم عــذر
وان نخيتـه جـاك مكسـوفٍ حسيـر = وان بـدا لــه غــرةٍ مـنـك .. غــدر
وانـهـزم عـنـك مـثـل زول البعـيـر = مـرخـيٍ راســه تـقــل يـتـبـع اثـــر
تـزكـي الاحـــرار لـصاح الـنـذيـر = لنخـيـت الـحـر جـــا يـهــدر هــدر
يرتكـي للحمـل لــو حمـلـه عسـيـر = مايـمـل الحـمـل لــو حـمـلـه كـثــر
وش يجيب السيف للموس الشطير = ذا لقص الـراس وذا لقـص الشعـر
لايـغـرك مـنـظـر الـعـود النـظـيـر = كــل عــودٍ يـرجـع اصـلـه لـلـبـذر
وان بـدا لـك لازمٍ لـو هـو صغـيـر = قبـل اخـذ الشـور والـعـزم استـخـر
شف حبال الليف مـع كثـر الجريـر = شـق دربـه فــي جلامـيـد الصـخـر
وان وصـلـت لقـمـة الـتـل لاتسـيـر = مــاورى القـمـه تــرى الا منـحـدر
والعـوافـي نـومـةٍ عـقــب الاخـيــر = فــوق طـعـسٍ نـاعـمٍ رمـلـه حـمـر
احمد بن عبدالرحمن العريفي
(نديم المجره)
المواضيع المتشابهه 
لايغرك منظر العود النظير = كل عودٍ يرجع اصله للبذر....... 
العرض الشجري
