السـلام عليكـم ورحمـة الله وبركاتـه حبيت أذكركم بشي منما كانن يعملنه جداتنا وامهاتنا وكيف كانوا يختارون الزوجه للولد؟ اذا كبر الولد وصار عمره 17... عاما تقول أمه لازم أفرح بأبني وأزوجه وأجيب له زوجه تساعدني في الحياه وتبداء بالكلام مع زوجها فــ يوافقها الراي وكانوا يدورون للبنت الشاطره في عملها وليس بنت الدلع والجمال والرشاقه زي بنات يومنا هذا فيقول الاب لزوجته بنت فلان ماشاء الله عليها شغاله وماتعرف التعب والكلل وطبعا تعرفها الأم فتقول له لا بنت فلان أشطر منها وعلي قد حالنا وبتصبر علينا يوافقها الراي زوجها ويروح يخطب لولده ولايخبره حتي يوافقوا أهل العروسه وطبعا أهل العروسه يطلبوا منه كم يوم
يشاوروا أعمام البنت وخيلانها وبعد كم يوم يردوا أهل العروسه بالموافقه ويقول ابو العروسه لأبو العريس تراء بنتي أمانه برقبتك فيرد عليه بقوله لاتخاف عليها تراها بالعين يرجع الزوج بخبر الموافقه ويقول لزوجته ويزهموا ولدهم ويخبروه فيقول الولد الي تشوفوه موافق عليه وتبداء مراسيم الزواج ويتم الزواج علي خير وفي اليوم الثالث من الزواج تقوم الزوجه تكنس وتنضف وتغسل وتعمل في البيت كل الاشغال وطبعا الاشغال كلها يدويه وتفاصيل ماتعمله تقوم قبل صرخة الديك تطحن الحب ( الذره ) بيدها علي الرحي وبعد الطحين تدخل( المخدم ) المطبخ وتعمل ( تدهر الخمير في التنار ) العيش وتجهز الفطور ومع شروق الشمس تقدم الفطور ويفطروا أهل البيت جميعا وبعد الفطور تخرج للأرض تحرث الزرع وتنضف تحت النخل الي الساعه تقريبا العاشره تلم لها حمله حشيش لغنمها وتشيلها علي راسها وتضوي راجعه لبيتها ولما توصل عند دارها تدخل ( زريبة ) حوش الغنم وتعطيهم الحشيش وتملي حوضهن ماء وتنظف روثهم تلمه علي جنب وبعدها تدخل للبيت وتسوي قهوة الضحي تقريبا الساعه 11 وبعد القهوه تقوم وتسوي الغداء وتجهزه بعد الظهر حوالي الساعه وحده وبعد الضحي تسوي الشاهي وبعد الشاهي تقوم المسكينه تغسل الصحون وتنظف وتنهي اي شغل في البيت الي بعد العصر وبعد العصر تخرج لحظيرة الحطب تكسر الحطب وتجيب الماء عــ كتفها او حمارها وبعده تحاول ان تعمل لها اي عمل لغاية المغرب وبعد المغرب مباشره تجهز العشاء تقدمه قبل اذان العشاء وتسوي الشاهي ويسمروا عليه لغاية اذان العشاء فيصلوا العشاء ويناموا وطبعا كل يوم يختلف الشغل عن اليوم الذي قبله فــ يوم تطلع الوديان وتحطب وتشيل حطبها علي راسها ويوم تسرح بالغنم ترعي بهن والبيت الكبير يجمع الكل الاب واولاده واحفاده وكان ابو العائله هو من يتحكم في البيت فزوجة الولد ماتخرج من البيت الا بأمر والد الزوج والزوجه مالها شي عند زوجها غير في السنه كسوه واحده وهي قطعة قماش عباره عن فستان وعبايه وبرقع وخرقه هذه الملابس تكفيها سنه كامله وكانن زمان اذا حملة المرأه ماتعرف دكتور ولاتراجع عياده بــ لتستمر في عملها حتي بعض النساء تجيهن الولاده وهن في الارض يزرعن ويحرثن فتولد بدون مولد او مولده وتشيل ابنها وتعود لدارها وكانت كل اعمالهن بيداتهن لامكانس ولابتقاز ولا غساله كانت حياه كلها نكد في نكد بس كانت قلوبهم طاهره ونظيفه واليوم شوفوا بناته مسكينات لو تعمل عمل يوم واحد فقط في حياتها كلها من ما كانن يعملنه امهاتناوجداتنا لجلست طول عمرها تفتكره وممكن تتقدم للامم المتحده بشكوي ولحقوق المرأه والي مجلس الامن بنات اليوم هذا بنات فضائيات وبنات سهر ليل ونوم نهار وهذه نعمه من نعم ربي عليهن بس واجب علي بنات اليوم ان يحافظن علي هذه النعمه بمساعدة امهاتهن في عمل البيت لأن بعض البنات مايعرفن اي شي في عمل بيوتهن مايعرفن غير الجلوس امام التلفزيون وماسكة الريموت تقلب من قناه الي قناه او ماسكة التلفون ترغي مع صاحباتها طبعا ليس كلهن ولكن الغالبيه منهن فـ لينظرن الي تاريخ نساء الجزيره العربيه عامه ويعتبرن من ما كانن يعملنه تلك الامهات الماجدات هذا ملخص من حياة امهاتنا القرويات وقد يختلف شي بسيط من منطه الي منطقه
المواضيع المتشابهه 
باحطـاب ( أمهــات الأ مــس وبنــات اليــوم ) 
العرض الشجري
