اليوم حاب اشرح طريقة شراء و بيع الدومينات للي حاب يطقطق و يستثمر مبلغ بسيط و يبدأ تجارة مربحة اذا مشيت على الخطوات مضبوط
أولا بأبدأ بتعريف الدومين الي هو بالعربي نطاق و الدومين باختصار هو اسم الموقع و الي يعتبر بمثابة سجل تجاري او علامة تجارية لممارسة الأعمال الالكترونيه عن طريق الانترنت و الدومين او النطاق ينقسم الى قسمين الاول اسم الدومين و الثاني امتداد الدومين
مثل hawamer.com
hawamer هو اسم الدومين و الـ com هو امتداد الدومين
و طبعا ما يحتاج تبدأ موقع الكتروني عشان تشتري دومين فيه ناس كثير تشتري دومينات بغرض التجارة بدون ما يكون عندهم موقع و اذكر لكم مثال fb.me اشترته فيسبوك بـ200,000$ يعني 750,000 ريال و هو ما كلف صاحبه الاصلي اقل من ٥٠٠ ريال
ثانيا طريقة الشراء فيه طرق كثيره ممكن تشتري دومينات مميزه و بأذكر أسهل طريقه و هي انك تبحث بنفسك عن الدومين المناسب عن طريق مواقع تسجيل الدومينات مثل
domain.com
register.com
و غيرها
و أهم النصايح الي لازم تتبعها اذا جيت تختار اسم نطاق و تشتريه هي على حسب الي انت مستهدفهم مثلا اذا انت مستهدف الاجانب مثل الامريكان لازم تعرف ذوقهم في الدومينات بالنسبة للي يبي يبيع للامريكان مثلا لازم تحرص ان يكون امتداد الدومين com او co او net و هي اقل رغبه و خاصة com هي الي مرغوبه بشده و لا يزيد اسم الدومين عن ١٠ حروف بحد اقصى و ابعد ابتعاد كلي عن الارقام او الشرطه في الدومينات لانها مو مرغوبه و احرص ان يكون الاسم له معنى و بسيط و سريع الحفظ و لازم تعرف كل امتداد وش معناه مثلا com يعني شركه و net يعني شبكه وco اختصار شركه و فيه امتدادات كثيره موجوده و في امتدادات لسا ما نزلت و راح تنزل بعد شهر لحقوا حالكم و تجهزوا عموما نروح لطريقة البحث عن الدومين بعد الدخول على موقع تسجيل نطاقات مثل 1and1.com
و بيكون فيه مربع بحث تكتب فيه الاسم و جرب حظك ممكن يكون مو موجود عموما شغلة البحث مو سهله و زيها زي اي تجاره لازم من التعب خاصة ان اغلب الدومينات الحلوه طارت و لكن ما زالت الفرص موجوده نجي الحين لحبايبنا العرب هنا يختلف الوضع ما همهم الامتداد بقدر ما يهمهم التميز و القصير تلقاهم طايحين بالدومينات الثلاثيه و حولها مع ان الغالبية تفضل com المهم برضو الارقام ما تفرق لأن بعضهم يستخدم الارقام كحرف مثل 3 يعني حرف العين و 6 يعني حرف الطاء و غيرها
المهم الناس اذواق حاول تفهم عقلية المشتري و راح تستفيد و على فكرة كل دومين يختلف سعره عن الثاني مثلا com يبدأ من ٥٠ ريال للسنه و بعضها أكثر و احيانا اقل على حسب العروض الموجوده في السوق بأعطيكم مثال على السريع بحثت امس عن اسم عربي يكون مميز و فكرت في اسم عرب و الامتداد مكس و طحت لي بالدومين هذا
3RB.MX
و ربنا يوفقنا في البيعه
اما المثال الثاني و الي انا فتحت فيه موقع حاليا كان خدمة اختصار روابط ففكرت في اسم ربط RB6 لسهولة الحفظ و قصير و مميز و الامتداد كان co لأن معناه اختصار شركة المهم هذا هو الدومين HTTP://RB6.CO
و بالنسبة لي واضح مدري عن البعض ممكن يشوف انه مو مناسب و لا تنسون هذي اسهل طريقة للشراء فيه طرق ثانيه زي الشراء من اصحاب دومينات في مواقع بيع و شراء الدومينات و ممكن تبحثون في قوقل عن هذي المواقع و فيه طرق اصعب و لكن فيها لقطات مثل المزادات و لكن كبداية خلوكم على ابسط طريقه الي ذكرناها
ثالثا طريقة بيع الدومينات ركز على نوع دومينك اذا كان عربي اعرضها في مواقع بيع و شراء النطاقات العربيه او المنتديات العربيه المتخصصه بالانترنت ووش كثرها خاصة ان العرب يحبون المنتديات بشكل اكثر اما اذا كان دومينك اجنبي فركز على مواقع بيع و شراء الدومينات الاجنبيه و اهم و اكبر موقع هو
sedo.com
معروف و ما يحتاج طبعا فيه طرق اخرى للبيع بس برضو هذي اسهلها اما الطرق الثانيه مثل المزادات
و اهم شئ للتجارة هذي بريد الكتروني و عنوان سكن و هاتف جوال و بطاقة فيزا او غيرها من البطاقات للشراء عن طريق النت و الي مره ميح او ما يثق يروح لمحلات الكمبيوتر يساعدونه هناك في شراء الأسم و يدفع كاش ووش كثر المحلات
اخيرا انا هنا حبيت اعرض تجربتي و الي حاب نساعده في شراء اسم مميز ولا الشراء عن طريق المزادات احنا في الخدمه و الي يبي يبيع برضو حنا في الخدمه و اي استفسار او مساعده حاضرين والي ما فهم علي يعذرني و ممكن يستفسر اكثر من الاخ قوقل خاصة ان فيه منتديات تعلمك خطوه بخطوه كيف تشتري الدومين اما انا كان تركيزي على فكرة التجاره بشكل عام
المواضيع المتشابهه 
مشروع تجارة الدومينات تدبيله بأقل من ٥٠٠ ريال 
العرض الشجري
