ريانة العود

بداية احب اقولكم ان حنا عايلة ثقافتها نعال.. ابوي متخرج بشهادة ليلي من المعهد الملكي ومهوب جودن به بس انه يطلب المدير فلوس متراهنن هو وياه على خاضور <-- عصفور للي مايفهمون ( بس هذا الي فالحن به ابوي ..)
و امي يقولون انها شارطتن ياواحد متعلم ولا منيب معرسه قالوا لهاانطقي ومير ماصدقت جاها ابوي تشعمطت به تقول ماشفنا العلم نفع احد <<-- الا والله بلاتس ميّسه ان كشرتس بيعني لها احد
فجاها ابوي على حمار وبمهر يقدر .. بخمس اوقيات دارسين و ثلاثه صاع حنّا .. وشرشف ومقطع زري لو يوزعونه ببلاش محدن خذه

المهم أني انولدت في أسرة اطلق كلمة تنقال عليها (ما عنك احد)


كبرت و انا راعية تفكير واجد.. جت في بالي وين كان ابوي قبل لا يعرس على امي؟؟ لو ان امي ما ولدتني هل ممكن يكون جدي هو ابوي؟؟ كيف الناس تجيب عيال؟؟ هل لأن ابوي راعي محل و يوم اعرس جيت انا ؟؟<--------لا عاد تفكرين لا نسكر الموضوع و نطلع


ذات عصرية من العصارير (مير من شاف زين الحتسي مارجا من الموضوع خير ) - و على عادة امي - قشت حريم الحارة عندها ونتفتني مع كراعيني عشان اصب القهوة <-----مهنتها منذو الازل
جلست شوي عندهم وانا اناظر الساعه الحائطيه ( الله واكبر يالساعه راسمين لهم بقلم رصاص على فلينه دويره وناغزينن بها عود اسنان وحاطينها تحت اللمبه بزعمهم الساعه الشمسيه )
احتري المسلسل المسكيكي ما تفوتني ولا حلقة كله عشان الاطخم نيكولاس ..يوم قرب وقته طمرت من عندهم ورحت اجيب لحاسة قرطاسة الكتكات لافزته بالفريزر عشان مايجون هالشعثان الغبران اخواني ويشلحونه ( اعنبو بطر(ن) تعرفونه يتهاوشون على قرطاسه ) ..توسدت المركات و فنجلت عيوني و بديت اتابع باخلاص

نيكولاس:أحبك..
انطونيلا: وانا كذلك..


شوي اللا هم ناتفينها بدعايات حفايظ و فمتو و خرابيط و اقعد اتحلطم بيني و بين نفسي..
هالمخرج مالقى غير هالشقرا يحطها حبيبته طيب لو هي سودا وش بيتغير ؟ النص و السناريو زي ما هو ياحبهم للتحطيم بس

ويرجع المسلسل..

نيكولاس: صدقيني حبيبتي لن استطيع أن اتزوج بك!
انطونيلا: إذن فلتنسى أن لك طفلاً ينمو بأحشائي!

انا:
مسرع توهم حابين بعض ما امداهم يعرسون بس هو قالها انه ما يقدر يعرس عليها! و هي حامل
واقعد اقلبها بعقلي..و استنتجت ان الحمل يحدث بالحب!

ياربيييييييه ..انا ما انبطح عند المسلسل الا عشان البطل ...و حبيته قبل لا تحبه هالبرصا .. على كذا حتى انا حامل!!

بالاول قلت زييين خلني حامل كم شهر عشان ينبت لي صدر زي الحريم (تحسبه شجر تينه ) و احر وضحى بنت جيرانا اني كبرت قبلها بس بعدين فكرت وقلت لو كبر الصدر بتكبر الكرشه ساعتها وش بتقولين لاهلتس يا فالحه!!

من الروعة اوجعني بطني..قعدت اتحسسه و الا حسيت بحركة الجنين في احشائي<---الشيطان شاطر
و اطيير للحمام و اقعد اصيح ياربييه وش هالفضيحه محد سواها قبلي

طلعت و تعوذت من ابليس و قلت شكل الحمل كذبي<------تأثير المسلسلات المصرية
رحت المجلس عند امي وضيوفها ابي اونس عمري و اسلي نفسي كودني انسى جلست و مدت لي امي تمرة..حامت تسبدي آكل حالي و بطني يعورني

ناظرتني ام حجيّج و تسنها تذكرت سالفة: الا يأم صنيتان امس نوير دقت علي تقول ان لها يومين ماتشتهي الاكل ..تهقين انها حملت؟
ام محيميد: وجع مالهم شهر من اعرسوا وشوله العجله؟ <----لولا الحمل و الغثا تسان صقعتها بالبيالة على خشتها

و يضيق صدري و اركض وانا حاطة يدي على ثمي و دموعي تصبصب ابي الحمام بس صار ابوي فيه <----ما عندهم الا حمام واحد م**ور الكيلون حقه وسادين الفتحه بخلقن لامي هيله الله يرحمها ماورثتنا الا هو

نصيت الحوش و بالي مشغول.. قعدت اتأمل اخواني الصغار قدامي يلعبون..اقول بنفسي ليه يا صوصو سويتي كذا؟ ليه تجيبين لهم العار ؟
انهرت و قعدت الطم على وجهي زي المصريات بالافلام و اشد شعري و اقبص بطني بقوة.. و في خضم التقبيص طرت على بالي فكرة..
قلت ليه ما اجهض هالجنين و افتك قبل لا يكبر بطني و انفضح ثمن عاد وش اقول لاهلي ؟ وهل راح يصدقوني لو قلت لهم ان ابوه هو نيكولاس ؟و نيكولاس هل بيعترف بطفلي و يجحد بزر انطونيلا الشقرا ؟

ضااااقت الدنيا علي..راسي الصغير أمتلى..لو أن الافكار لها لون تسان شفتوها تطشم مع هالفلقات اللي بجبهتي ..هجيت لغرفتي و رميت نفسي على فراشي..
صرت اتأمل حالتي.. بنت توها بزر و حامل!! بدون عرس!!
مجرد الفكرة كانت تقتلني.. صرت اقول لا لا و ابكي بصوت مكتوم وانا ماسكة بطني
كرهت نفسي..كرهت نيكولاس.. كرهت العالم.. هذا جزا اهلتس يا صوصو!!
ابوتس يشتغل طول النهار وبالشهر يجيب لتس تكتاك وااانتي توزينه عشان تاكلينه عند هالمعون نيكولاس!! يشتريه لتس عشان تتوحمين عليه يالوصخه!!

ناظرت بالمراية.. وجه اصفر مخضر ( وجه ذا ولا قفى عنز )..عيون متنبخه.. خدود راطشه من الدموع,, خشم يسورب..
قلتها بنظرة ثاقبه: الموت ولا العار

قررت انتحر.. رحت قريت اوراد الصبح و المساء عشان اذا مت ادخل الجنه <------ لاتلوموني الفضيحه شينه
جبت فليت و غمضت عيوني و تشهدت ثمن سميت.. قضى الفليت و طلع من الغرفة انواع الذبان و الصوارير و انا ما طقيت له خبر ! آخرتها صقعت راسي بالعلبة وانخمدت

فتحت عيوني الصبح وانا تعبانه.. حسيت ان كل شي صار كان حلم..تقلبت على بطني والا اسمع صدى دقات قلبي في كرشتي..ينعن ابوه الموضوع جد! خلاص الجنين تكون و هذا هو قلبه ينبض ببطني! و ايقنت اني حامل

قمت غسلت وجهي و اول مرة افرش سنوني موب نظافه الا عشان ابلع المعجون كوده يتسمم و افتك
سلمت على امي و ابوي صايرتن بارة بهم لاني احس بالذنب و عييت افطر
رحت لم اخوي صنيتان قلت له اني شريت حزام جديد وابي اتأكد هو اصلي والا والا لا (حزام و هي تمشي حافية الا يوم العيد ) يعني ابيك تعطيني كم بقس عليه ابي اجرب مدى تقبله للمحيط الخارجي
الولد ما صدق خبر.. قعد يكفخني مع خشتي :s قلت له شف اذا بتطقني على وجهي بعلم عليك ابوي(هالكلام بعد ما عرمشت كتفه ) ..
المهم قعد يتفنن بالبكوس و انا ولا حرف كل شوي اتحسس بطني هو حي والا مات
شالني فوق جدعني على الارض .. قمت بسرعه اشيك على الوضع بس ماش ابن الكلب متشبث بالحياة لاقصى درجه

يوم انهد حيلي انسحبت.. عاد اجتمع علي جوع و طق.. جاني وجع لو اني اعرف الطلق وقتها تسان قلت انه هو
شربت مويه و اكلت برتقالة عشان لا يجيني فقر دم <----تأثير سلامتك سلامتك نود لك سلامتك
وقلت اليوم لازم احسم الامر.. رحت الحمام و كتبت وصيتي على ورقة دفتر ابو وجه و وجه.. على اساس اني بمسح العار و حطيت الورقه على طرف البانيو..

قعدت اناقز بمحلي و اصقع ببطني الجدران.. اسد خشمي يقالي بكتم نفسي بس دلخة اتنفس مع ثمي و لا صكيته بيدي ارجع اتنفس مع خشمي.. بحلت بعمري انا
قلت بطمر من الشباك بس طلع فيه شبك.. و حولت وجهتي للشفاط.. مديت صبعي فيه انقطع و بعدي ما مت!!

قعدت تصبصب دماميني و انا اصايح ياربي انت اعلم بحالي ياربي انا ما كنت اقصد ياربي لو تفكني من هالعار لا اتروح باليل والنهار واغدي امام ( رخمه وتطوعت ) واحث الناس على الصلاة يارب لو خذيت اللي ببطني معد اسرق بكلات وضحى


ويلهمني الله و تجي عيني على الشفاط حق الحمام الي اذا انسدت المغسله قعدو يشفطون به.. و ادخلها بحلدزي وادوج بها .. طلعت بلاوي مع خشمي..قشام حب ، فتات مناديل ، قطع لم تُحدد هويتها بعْد.. حتى زرار قميصي الاصفر اللي لي سبوعين ادوره لقيته

استمريت وانا ادخل و اطلع ادخل و اطلع الين قلبت معدتي و طرشت.. موية و عصارات معديه وقراطيس الكتكات الي انا الحّسهن كل يوم و قطعه كبيرة صفرا (البرتقالة اللي كليتها ) و اناظر واقول الا هذا راسه هذا راسه ابتسمت وانا معرقه و عيوني مدمعه و وجهي احمر .. حسيت براحه و قعد اشكر الله بعدين التفت على البرتقالة و ضميتها و قعدت ابكي ولو الضنا ما يهون <-- على تراب

تروشت ولبست نفس الملابس و جمعت ولدي بكيس و دفنته بالحوش و على طريقي قابلت صنيتان..
انا: الحين وراك يوم قلت لك تعال نلعب قمتا تطق بقوة ؟
هو: هماتس تقولين انتس تبين تختبرين عضلات بطنتس
انا: الشرهه على اللي يلعب معك يالتسلب

و البخه كف و اشوته و اروح المطبخ ابلع لي نص الثلاجه ان ما كانت كلها <--- بنفاس ولازم تتغدى زين وبديت اقول لامي يمه تراي مشتهيه مرقوق بحلبه


ويوم جا العصر حطوا على المسلسل .. تفلت على الخاين نيكولاس و عييت اتابعه قلت حطوا على الحرم ازين
و من يومها وانا محرمه احب رجال ..حتى ابوي حاولت اكرهه عشان لا تتكرر معي هالمصيبه .. الين صرت اولى متوسط و قابلت صديقتي المثقفه شرعاء و حلفت لي ان الحمل مستحييل يصير بالحب
عااااد انا ما صدقت خبر و حبيت بيكام من ذاك الوقت الى يومكم و لو نظريتي صحيحة تسان امداني جبت منه 6 عيال عالاقل


الزبده::
1- علموا اولادكم الرماية والسباحه و ركوب الخيل ويا حبذا يعني يا حبذا تعلمونهم كيف تحمل الحرمه <-- رؤوس اقلام بس


2-يتضح لكم -في اكثر من مقطع - مدى تأثر بطلة القصة بما يعرض بالتلفزيون..
لذا يجب تشديد رقابة الاهل لما يتابعه ورعانهم..

3- بيان ان صوصو كائن حي

4- المسلسلات الم**يكية دمار تام.. قصصها لا تناسب مجتمعاتنا.. فمن الاحوط عدم مشاهدتها و اذا ملزمين فبالطقاق لكن احرصوا على ان لا يتابعها البزران..

5- يا كثر قرق الحريم يعني لو ما طروا سالفة نوير تسان عدى الموضوع على خير بس قدر الله و ما شاء فعل

6- الطفولة براءة.. لا تساهموا في اغتيالها بالاهمال..

شمس الحب

تستطيع المشاركة هنا والرد على الموضوع ومشاركة رأيك عبر حسابك في الفيس بوك

---

uk]lh ;kj lvhiri ]ghoi fgh p],] jl,j qp;