منتديات شمس الحب - لا تذكرت الغياب وقلت يالله لاتعيده ــــــــــــــــــــــــــــ بقلم سعــــــــــــود

اقبلوها كما هي

بعنوان

لا تذكرت الغياب وقلت يالله لا تعيده

إن كتبتك في قصيدة لعنبو ذيك القصيدة
لعنبو كل الحروف اللي تحاول ترتقي لك

أشهد انك فوق وصفي وسط قلبي في وريده
اتربص بالمعاني واتحفز وارتكي لك

أحسب اني قد وصفتك في دواويني الجديدة
واثرني لازلت تايه وسط خامر سلسبيلك

طوّعيها يا الليالي علّها ترضى العنيدة
يمكن ينسنس هواك وينتشي خافق عليلك

اذكريني لاكتبتك وارحمي عين ٍ سهيدة
ظلليني في غرامك واحتوي خافق خليلك

لاتذكرت الغياب وقلت يالله لاتعيده
تعرف اني ما نسيتك واسالي قلبك دليلك

تلني يا قاف شعري للمراقيب البعيدة
يم يعفور الغرام وشاغل الدنيا وجيلك

الوعد ريضان صدرك والكواعيب النهيدة
والمروج اللي تدّلت سحر من باهي جديلك

وإن رسمتك في حروفي تاهت الريشة بليدة
اعذريني واعذريني والعذر آخر جميلك

الله اكبر يا الأنيقة مستحيلة يا الفريدة
والله اني ماوصفت ولا نصفت وعزتي لك

والله انك راس مال وعزوة سعود ورصيده
والله انك روح روحي وآآآآآآآه ويا حبني لك

مير يابنت الرجال اللي على الصملة شديدة
اجبري كسر القصيد وجاملي يافدوتي لك

سعــــــــــــــود