المصري جاوب عن بلده
لكن جوابه ينطبق على أغلب
الدول العربية والإسلامية
============
لما طرحنا موضوع النشاط الاقتصادي للجيش للنقاش لاحظنا ان كتير من التعليقات كانت بتدور حول نقطة التصنيع العسكري والاكتفاء الذاتي من التسليح. ودي نقطة مهمة تستحق اننا نتوقف عندها
هو ليه احنا مش بنصنع سلاحنا بنفسنا ؟؟
مبدئيا لازم نفهم السؤال ونحاول نفكك محتوياته ... حضرتك بتقصد بصناعة السلاح صناعة سلاح تقيل ولا انظمة تسليح وذخائر ؟؟
اول ما سيدور بذهنك لما نسأل السؤال ده انك تقصد بالسلاح الدبابات والطيارات والمدافع. التسليح التقيل يعني. هنسأل هنا سؤالين مهمين
الاول :- هو عدد دول العالم كام دولة ؟؟
الثاني :- كم دولة منهم تنتج هذه النوعية من السلاح ؟؟
الاجابة بالترتيب :- 220 دولة منهم 10 مصنعين للسلاح (امريكا - روسيا - انجلترا - فرنسا - المانيا - ايطاليا - السويد - الصين - كوريا الجنوبية - البرازيل)
يعني اقل من 5% من دول العالم تنتج سلاحها بالكامل. نظرة اصلا علي اسماء
الدول توضح حجم
الدول - جغرافيا وبشريا - وقوة اقتصادياتها بل وانها في الاغلب دول استعمارية قديمة
باقي ال 95% من دول العالم لا تنتج سلاحها بالكامل. ليه بقي الوضع كدة ؟؟ لان صناعة السلاح هي في النهاية صناعة لها الاركان الاساسية لاي صناعة اخري (الانتاج - التسويق- التوزيع - البيع) واذا حدث اي خلل في اي ركن ستنهار هذه الصناعة تماما. الخسارة هنا لا تعني فقط توقف المصانع وتشريد العمال ولكن تعني ايضا عجزك عن توفير قطع الغيار وعمل الصيانة اللازمة للمعدات. حاجة شبيهة بكدة حصلت لفرنسا في انتاج طائرات الرافال - ظلت 15 سنة بدون اي عقد شراء ووصلت الازمة لحد افلاس وشيك لشركة داسو افيسيون المصنعة للطائرة حتي انقذتها مصر بعقد محترم تلاها عدة عقود لقطر وللهند. المشكلة حدثت للرافال بسبب ان فرنسا مرقت عن سطوة امريكا في تصنيع هذه الطائرة فعاقبتها امريكا بمطاردة جميع زبائنها المحتملين واغرائهم بعقود اخري مثل الصفقة المصرية الامريكية والتي اشترينا فيها 24 مقاتلة اف 16 52 الاحدث عالميا -
طب انت في مصر تقتدر تستحمل ضربة زي دي ؟؟ اقتصادك يشيل يعني ؟؟ طب
ايه الحل؟؟
انتاج تحت رخصة تصنيع محلية
ده الحل .. انت بتشوف احتياجك ايه وبتتفق مع المنتج انه يقيم مصنع في مصر وتنتج السلاح اللي انت محتاجه في بلدك. انت كدة بتصنع احتياجاتك وفي نفس الوقت مش بتشيل مخاطر التسويق والبيع والتوزيع
طب احنا بنعمل كدة في مصر ؟؟
ايوة يا فندم. واشهر ما يتم صناعته في مصر دبابات الابرامز ايه 1 ام 1 - المصنفة من ضمن الافضل عالميا - من منتصف التسعينات. وبتعمل كدة في مروحيات الجازيل الخفيفة وطائرات التدريب المتقدم كيه 8 - مرفق صورتها - غير السيارات رباعية الدفع الخفيفة من طراز رانجلر. وفي العقود الجديدة عملنا نفس الموضوع مع الرافال ومع كورفيتات الجاويند اللي بتتجمع حاليا في مرفأ الاسكندرية
ايه ده يعني احنا بنصنع سلاحنا ؟؟؟
اه يا فندم حضرتك بتصنع اللي تقدر عليه من تسليحك الضروري. وفق امكانياتك. مش بس كدة انت عندك بعض المعدات اللي بتنتجها من الصفر عندك زي ناقلة الجنود الشهيرة فهد وبتصدرها كمان - مرفق صورة المدرعة والتي تحمل شعار الامم المتحدة - وانتاجك ده اثبات كفائة واقتصادية عالية في التشغيل. حاجة تفخر بيها يعني
طب ومخاطر الانتاج اللي اتكلمنا عنها بتغطيها ازاي؟؟ عن طريق اننا ننتج سلع استهلاكية ونطرحها للسوق ودي تصرف علي دي .... زي السخانات والبتوجازات كدة !
ايه ده يعني احنا عندنا انتاج للسلاح وحتي الانتاج المدني الصناعي معمول للصرف علي الانتاج العسكري ؟؟!!
ايوة يا فندم بالضبط كدة ...الحقيقة عكس الصورة اللي البعض رسمها في ذهنك تماما. وازيدك عارف لو توقفت المصانع الحربية عن انتاج بعض المنتجات المدنية هتكون النتيجة ايه ؟ ان انت مش هتقدر تصرف علي صناعاتك الحربية
وده المطلوب بالضبط من ترويج الاشاعات وتسفيه الانتاج اللي انت بتعمله .. فهمت ؟!
نرجع لاول سؤال ... انت تقصد سلاح تقيل ولا انظمة تسليح وذخائر ؟؟
كل المقال ده بيتكلم عن السلاح التقيل والصناعة الكبيرة. ليه؟؟ لان انظمة التسليح (انظمة الاتصالات والتحكم والتوجيه وبعض الصواريخ الموجهه) والذخائر من مختلف العيارات واغلب الاسلحة الخفيفة (البنادق - الرشاشات - المسدسات ) بيتم تصنيعهم محليا
الموضوع مش محتاج مجهود كبير من ناحيتك علشان تتأكد. بص كده علي اي جندي معدي في الشارع هتلاقي في جمبه طبنجة (حلوان) او شايل كلاشنكوف (المعادي) !
اه طبعا في انواع اخري بنستوردها زي المستعمل في الوجدات الخاصة ولكن تظل الاغلبية الاكبر من التسليح الشخصي مصرية صرف
اخر نقطة لازم نلفت الانتباه اليها ... هي سفينة عملاقة زي الميسترال دي صناعة ايه ؟ وكانت معمولة لمين اصلا ؟؟
صناعة فرنسية ومعمولة لروسيا في الاساس. يعني دولة بحجم روسيا وتطور صناعتها العسكرية راحت تشتري سفينة من دولة اخري، وانت البعض بيعايرك في مصر انك معملتش الميسترال عندك !
ده طبعا قصور في النظر - ونمشيها قصور نظر مش جهل او تزييف وعي او متاجرة او رغبة في الهدم - من اللي بيقولك عايزين نصنع سلاحنا بالكامل وان مصر مش بتصنع سلاحها الي اخر هذه الخرافات لاننا باختصار بنصنع ما نقدر علي صناعته محليا ونشتري ما لا نقدر علي صناعته زي اي دولة في العالم وبنصرف علي انتاجنا ده من جيوبنا
اللي بيقولك مش بنصنع سلاح ده واحد مش كويس ... ماتمشيش ورا كلامه !
المواضيع المتشابهه 
لماذا الدول العربية والإسلامية لا تصنع أسلحتها ؟ إقرأ الإجابة المسكتة 
العرض الشجري
