تلمستك طهر
 

مثل ما انّك على قد السوالف جبتني لأقصاي
تجيبك لي النوايا أشباه .. لين اجمّع ظنوني

وانا عندي النظر يطوي الفراغ وتستريح خطاي
لاني من زمان ازرع صدق والناس.. يجنوني

هذاك اوّل .. وأنا اسمّع شوارع حيّنا مغناي
الين انّي صمخت إذن الحمام وطيّر لحوني

احط ايدي إلى ضاقت علي سنيني : بمخباي
واظل انفخ هواء صدري /اصفّر /ارجع بدوني

لانّي كنت .. الى منّي سمعتك تنتخي دنياي
اروح اكسر لجل تهنا .. خواطر ناس يغلوني

اجل لو كنت ما تدري فأدر وسولفه للماي
عشان اليا مشيت اذكر بأنك اوضح طعوني

تلمّستك طهر .. وادري بإنك كل يوم براي
وذي غلطة عمر تنهش بقلبي وتنزع جفوني

ولكن لك اجر إنّي عرفت اصحابي من اعداي
وعرفت اللي اهم اني اشوف الموت بعيوني !