|
كل ماباركت لعروس وقالت عقبالك السلام عليكم ورحمة الله وبركاته كيف الحال ؟ هذي روايتي مافيييش احد الا خليته يقراها بصراحه ولامدح لي عشقتها انا تهبل رومنسيه واكشن وغامضه ...إلخ اقرو هالبات واذا اعجبتكم بنزل الباقي واتمنى اتمنى اتمنى من المشرفه تثبت الموضوووووووووووووووووووو وووووع لين اخلص روايتي والبارتات يلا قرآءه ممتعه ~كل ماباركت لعروس وقالت عقبالك يرتسم في بالي خيالك كاشخ ببشتك وعقالك~ اخذت نفس طويل وغمضت عيوني وذاكرتي رديتها لورى بقولكم حياتي اللي مرت مثل روايه عجيبه .. يمكن ما أعرف اعبر بس بحاول اعطيكم حياتي بتفاصيلها كنت بثالث متوسط جسمي صغير ويمكن تفكيري برضو صغير اللي يشوفني مايقول عمري 15 يقول عمري 10 سنين شعري طويل يمكن لنص ضهري وناعم على امي طبعا وعيوني وساع وناعسه والاسود غالب على الابيض الشي اللي ملفت فيني عيوني رموشي كثيفه وطويله وحواجبي كثيفه وكأنها مرسومه ملامحي عاديه جدا فقط عيوني الجميله ويمكن شعري .. كان لونه غجري وليه "كان" وللأن لونه غجري ونص ضهري وغالبا ما اربطه ذيل حصان ناعم مثل امي وصل عمرها 40 وشعرها ناعم وماتغير بس امي ماشالله انعم مني بكثير .. انا ناعم بس مموج وطالع شكلي طفولي اكثر مممم انا مو بيضا ولا سمرا برونزيه خشمي عادي جدا كنت قصيره وهذا اكثر شيء مخليني طفوليه ومربربه من هذاك اليوم حبيت انقلكم قصتي هذا اليوم بالنسبه لي غير غير عن كل الايام بطلع من فترة الطفوله وبدخل عالم غير عالم يضم ناس عمالقه عمالقه !! بالنسبه لي عمالقه لاني قصيره غمضت عيوني وانا اسمع المديره تنادي وحده وحده تكرمها وبعد نص ساعه بتبدا المسيره اللي اكثر شيء متحمسين لها بحفل التخرج سمعت اسمي وجتني نفاضه وحسيت بالخوف قبل اي خطوه تردد مشيت بخطوات سريعه واخذت منها الدرع وسلمت عليها كنت حابسه دموعي مابي يخرب الميك آب اللي مكبر ملامحي الطفوليه بس للاسف خانتني دموعي مجرد ماشفت امي ترقى على المسرح بصعوبه لكبر سنها حضنتها وجلست اصيح حتى مدري بذاك الوقت وش قلت لها اصلا ماكنت اشوف الا امي سلمت بعدها على خالتي اللي صاحبت امي او امي صاحبتها .. نزلت من المسرح وانا اشوف الامهات كل وحده تصور مع بنتها ولا تصور بنتها وصجه وازعاج بدا الحفل بحماس قوي وانتهى بدموع غزيره سحبتني ميمي لمكان اللي ضم ذكريات رهيبه رسخت بالذاكره هذا المكان اللي ضمنا بعد كل حصه رابعه حصة الرياضيات لا هربنا من الحصة والمكان اللي ضمنا لا جبنا الممنوعات وهذا المكان اللي ضم سواليفنا وضحكنا وبعد حزننا وصياحنا جلست أتأمله ولاشعوريا طاحت دموعي مكان صغير مستودع بس احنا فضيناه ونضفناه وخليناه لجمعتنا ميمي : اقول العنود انا ماجبتك تصيحين وتتذكرين خلي الحزن على جنب تعالي نصور طلعت كمرتي واخذت لاعز 3 صديقات لي اللي حبيتهم وبضل احبهم يمكن الزمن يفرقنا وبالصدف يجمعنا اخذت يمكن 8 لقطات وبديت اصور كل جزء من المدرسه بالنسبه لناس بيشوفون المدرسه اقل من عاديه بس انا كنت اشوفها قبل كريهه والحين عضيمه آآه الزمن يجمع الاعداء ويفرق الاحباب حضنت منيره ومزنه احنا مانقولها مزنه عشان ماتتعقد اسمها كبير على عمرها نسميها ميمي وهاجر كلهم اعزهم واحبهم بس ميمي غير ميمي اهي اللي تعرف صغيره وكبيره بحياتي اقولكم عنها بعدين او انتم اكتشفوها من خلال قصتي حضنت اغلى صديقات مضيت معهم 9 سنوات آآه مسرعها مرت امس كنت اصيح خايفه بدخل أولى ابتدائي واليوم اصيح بودع المدرسه وبدخل الثانوي ياترى بعشق الثانوي مثل الـ 9 سنوات مرت مثل البرق آآه الله يعلم جت امي تلهث اهي وخالتي امي : وينكم بالله هذا مكان تجلسون فيه يلا عنوده مشينا التفت على امي اللي متركيه على الباب وركبها تعورها وخالتي اللي تناضرني وكأنها تقول اخلصي علينا بنمشي ودعت صديقاتي وسويت لهم بوسه بالهواء |
وطلعت بالساحه البس عبايتي امي : يلا العنود استعجلي اليوم بنطلع للمزرعه انا : طيب يماه البس عبايتي خالتي : اسمعي امك ماتتحمل الوقفه كثير بطلع انا وياها وتعالي انا : زين زين اطلعوا وبالحقكم خالتي : بس اسمعي سواقكم ماجاء اللي بيرجعنا ماجد شهقت : مــــــــاجد !! خالتي : يلا بلا افلام هنديه بطلع والحقينا انا : زين زين طلعوا خالتي وامي ولبست عبايتي وحطيت شنطتي على كتوفي حسيت بيد على كتفي التفت لقيت ميمي وهي حابسه دموعها انا : ميمي !! ميمي : العنود بفقدك خنقتني العبره : وانا بعد بس برضو بلزق في بيتكم ميمي تنهدت وتنسندت على الجدار : حتى لو مو قادرين نجتمع مثل قبل مو قادرين نسولف مثل قبل كلش بيتغير بحياتنا كلش حضنتها : ميمي حياتي لاتخليني اصيح "شهقت" بقولك شيء ميمي : وشو ؟ ابتسمت : ماجد اهو اللي بيردني ميمي : جد والله !! يابختك غمضت عيوني وسرحت بعالمي الخاص صحيت بصوت ميمي ميمي : يالخبله بسرعه روحي امك بتلفعك انا : اوووه نسيت يلا باي ولوحت لها بيدي وجيت بطلع بس وقفت فجأة والتفت ببطء ورفعت راسي اتأمل المدرسه شفت شباك فصلنا اللي مليان بصمات اصابع وكتابات وكل وحده عبرت مشاعرها بالشباك وبالجدار اما انا كاتبه بخط صغير ولون احمر "احبك ماجد" وحطيت روج وبست الكلام للحين اشوفها واتمعن فيها فيني شيء مايرضى يخلي غيري يستولي على المكان اللي يحضن 9 سنين صارت الحين فقط ذكريات أليمه سويت بوسه على الهواء وتغطيت بطرف الطرحه وطلعت ماجد ولد خالتي بس بالنسبه لي مو بس ولد خالتي كنت اناضره بنضره غير احبه اعشقه من كان عمري 8 سنوات وابواب الحب مابعد تفتحت بقلبي بس كنت اشوفه غير عن العيال ماكنت اعرف ان هذا (الحب) بس كنت متأكده من شعوري بالنسبه له ايش بس للاسف حب من طرف واحد !! اهو حتى مايعبرني يعشق بنت خالتي اسمها هيفاء اهي صديقة عمري وحياتي بس كنت احسدها على اهتمام ماجد فيها كنت اتمنى لو شعورة ينقلب معجزه يوم من الايام لي بس مول مايفكر فيني حسام يعشقني شويه عليه كلمة يعشقني بس للاسف ما احبه ابدا سبحان الله !! شوف الزمن يضحك علينا اللي احبه مايعبرني ويحب اللي ماتفكر فيه واللي يحبني ما افكر فيه صحيت من افكاري على صوت امي امي : كل هذا تلبسين عبايتك انا : يماه آخر يوم لي بهالمدرسه طبيعي اتأخر واسوي اللي ابي امي : من جد قلة حيا انا : زين يماه آسف امي : ثاني مره لاتعودينها انا سامحتك لان هاليوم تخرجك انا : اشواه بعد سمعت صوت ماجد اللي ابتسم ما ابتسم عشانه يحبني لا |
لا ابتسم لاني بديت اتغطى عنه بديت ممممم قبل امس يوم رحنا لمزرعه امي سحبتني وجلستني عندها وقالت لاتروحين مع العيال ماجد : مبروك يا العنود عقبال ماتتخرجين من الجامعه انا : الله يبارك فيك عم الهدوء بالسياره من جديد انا من يوم عمري 3 سنين وانا امشي مع العيال لان مافي بنات كبري هيفاء اصغر من بسنه وكانت صيوحه ومتعلقه بأمها فضطريت امشي مع العيال اللي بيني وبينه فارق فالعمر كانوا ذاك الوقت عمرهم 7 سنين اندمجت معاهم وصرت وحده من شلتهم الا قبل امس صعب تفارقين شله عاشرتيها طول حياتك بس هذي الدنيا .. صح ان هذاك اليوم كله مانمت وكنت احس بضيقه لاني ماراح اشوف ماجد كثير او يمكن ماراح اجلس معاه اخذ واعطي تنهدت بضيق حست خالتي بالضيق بس للأسف محد فاهمني او فاهم سبب ضيقي خالتي : العنود !! ادري ان صعب تفارقين شلتك ووناستك اللي بتندفن برمل المدرسه وبتصير فقط ذاكره بس اصبري الدنيا كذا بكرا بتفارقين اهلك وتروحين بيت رجلك انتفض قلبي من كلمه "رجلك" بسرعه ناضرت ماجد من المرايا اهو حتى ماعبرني جالس يسوق ويناضر الدرب وسيم !! شويه عليه كلمه وسيم فيه كل معاني الجمال والوسامه عيونه ذباحه نضراته ..نضراته اهي اللي اكثر شيء خاقه عليها كانت ولازالت نضراته حاده وتحسينها تحمل معاها حزن وألم كتمها بعيونه وبخافقه بذاك الوقت اخاف اتهور واحضنه من ورا بسبب نضراته الذباحه عيونه وساع وتقريبا مثل عيوني بس اهو حواجبه عريضه وحواجبه اجمل مني محلق لحيته ومخليها سكسوكه مره خقه وشعره ناعم والى آخر رقبته تقريبا جسمه شويه عليه كلمه عملاق يوم كنت صغيره وعمري 3 سنوات واهو 7 سنوات كان طول امي تقريبا او اقصر شوي ..جثل اخاف لاقربت منه لاني اوصل لخصره اهو مو طويل بشكل قبيح لا بالعكس طويل وجثل جسمه رهيب وكتوفه رازه وجسمه جسم ملوك .. قطع علي تفكيري صوت خالتي خالتي : شفيك سرحتي ؟ ابتسمت بتثاقل : ولاشيء خالتي تناضرني من ورى الطرحه الخفيفه بتمعن وتفحص خالتي : ذبلانه ماعجبتيني اليوم مفروض تصيرين مربربه ومشرقه كتمت ضحكتي على كلمه "مشرقه" ابتسمت : ماعليه دومي لاتضايقت اصير ذبلانه آه جوعانه مره ماكلت شيء من صحيت لاني كنت متحمسه بقوه هههه الله لايوريكم حالتي الفجر بغيت اطلع وانا مالبست عبايتي ابدا ماتعودت اصير رسميه مع ماجد اول كنت امون عليه أكثر واحد من الشباب ياربي جوعانه طلع بطني صوت اشاره للجوع استحيت وبدا يتقلب وجهي الوان ماجد كاتم ضحكته : كان قلتي من قبل اني جوعانه تدرين ان المدرسه بعيده عن البيت كثير ابتسمت بخجل : هاه لابس بطني يعورني اضاهر انه قولون ماجد : ماعليه اصلا خاطري ببيتزا امي : ياحياتي العنود من صحت ماكلت شيء رصيت على شفايفي اللي تحت بحيا انا : يماه ماعليه اصلا مو جوعانه انا ماجد من اكبر صفاته يحب ينرفز الواحد يحب ينزل قدر الواحد نفسه عزيزه شوي عليها كلمه عزيزه من صغره وهو رجال ماجد : اجل خلاص مافي بيتزا ولاشيء بنكمل الطريق بغيت اصرخ وابوس رجوله واقوله لاء يرحم امك جلست اطقطق اصابعي والعب بطرف طرحتي وخاطري اصفعه يحب يقهر الواحد وينرفزه امي : ماجد !! اقول بس يكفيك نرفزه وقف عند المطعم البنت تتلوى جوعانه ياربي امي بتكحلها عمتها اهيء اهيء وش بيقول عني |
ماجد : يلا عشان خاطر خالتي اول ماوقفنا عند بيتزا هت ونزل ماجد يشتري بيتزا تقدمت شوي بعد مافضت السياره من ماجد انا : يماه فشلتيني عند ماجد خالتي : هاااو تتفشلين من ماجد اللي كنتي تصاحبينه الى قبل امس تقولين روحين بجسد استحيت : بس ولو شبيقول عني بيمسكها علي هالسالفه مو ناسيها امي : ماقلت شيء انتي جوعانه وابيه يوقف تعرفين مشوار البيت والمدرسه سكت بعد مايأست منهم وماقدرت افهم شعوري اللي يمكن انا مافهمته يمكن لاني تغطيت عنه آه لوتشوفوني قبل امون عليه بشكل كبير بتستغربون هالكثر انا اعرف عن ماجد عن كل كبيره وصغيره بحياته وصفاته .. لاني احبه احبه .. انا الوحيده اللي من الشباب والبنات افهمه وافهم كلامه قبل لاينطقه احلف لكم بالله اني اعرف وش بيقول وش يمكن لاني اتعمق بكل شيء فيه الا شيء وحيد ما أعرفه تفكيره احيانا يناضرك بنضره غريبه وتفكيره شيء صعب صعب معقد تفكيره ونضراته اموت عليها حاده .. دخل ماجد ومد لي الكيسه ابتسمت بخجل ومديت يدي واخذتها من الطرف وشلون باكل كيف ؟ مستحيل افك الطرحه امي بتقتلني بعدين عقب الموقف ما أبي احط عيني بعينه قطعت قطعه صغيره من البيتزا ودخلتها من ورى الطرحه واكلتها وهي حاره آه لذيذه اعشقه هالمطعم خالتي : ماجد !! توك قايل اني مشتهيه ليه ماطلبت لك ماجد ويبتسم ابتسامه غريبه وكأنها سخريا ماجد : لابس عشان الست الحسن والدلال العنود نزلت وجبت لها وقفت عن الاكل فجأة كلامه فيه نبره غريبه لاتضحكون علي وتقولون اطباعك عجيبه انا اعرف نبرت التهديد والسخريا والغضب حقت ماجد بس هالنبره فيها شوي من الحنان لا لا مو حنان أي حنان أي بطيخ يمكن تهديد او انتصار لا والله نبره غريبه ياربي ودي افسره نبرته اهو صعب الفهم صكيت كرتون البتزا ودخلته بالكيس ومديته لخالتي انا : شبعت خالتي تفتح الكرتون وتناضر خالتي : بالله هذا أكل ؟ انا : خلاص خالتي والله اني ما اشتهي اكل من الاصل امي : آه منك غريبه وش بنسوي بالباقي ماجد : بعطيها حارس العماره اللي هناك "ويأشر على العماره" امي : تسوي خير ياوليدي وقف ماجد ومدها للحارس وكملنا الطريق وآخيرا وصلنا البيت دخلت بخطوات ثقيله ودخلت خالتي وماجد وراها وانا امشي بالدرج صقعت بفهد فهد : آآآآآه يالمتوحشه دخلتي ببطني مالك عيون ؟ انا : فهيدان !! وش جابك يالهيس ؟ فهد ببتسامه خبث : كنتي تفكرين فمين ؟ قلت بنبره سخريا : لا اللي في بالك مو صح فهد : أجل تفكرين بأيش ؟ انا : بمدرستي وحفل تخرجي فهد : أووه نسيت اقولك مبروك يا أختي العزيزه انا : الله يبارك فيك يا اخوي العزيز اللي توه يتذكر يقولي مبروك فهد : ههههه ماجد هينا ؟ انا : يب ^^ اهو وخالتي فهد : ماجاء فارس انا : عائله خالتي كلها تجي تاخذني من المدرسه مهبول انت فهد : هاه ايه صح راح على بالي جوا يزورونا انا : والله انك مفهي وخر بس خلني اروح ابدل كمل طريقه فهد ورقيت لغرفتي رميت الكيسه اللي منغرقه هدايا وخرابيط وفصخت العبايه حقتي وعلقت عبايه التخرج ودخلت الكيسه بالدولاب حتى ما فضيت افتح الهدايا .. ودخلت اتروش بعد ما أخذ شور بارد بهالجو الحار طلعت من الحمام "الله يكرمكم" ودخلت غرفه الملابس وبدلت ملابسي |
| الساعة الآن 01:46 PM بتوقيت مسقط |
Powered by vBulletin® Copyright ©2000 - 2025, Jelsoft Enterprises Ltd.
Search Engine Optimization by vBSEO 3.6.0 Designed & TranZ By
Almuhajir