اسمحوا لي ان اكتب باللهجة العامية
قبل فترة ليست بالطويلة دخلت احد البنوك (صالة تداول الاسهم) لفتح محفظة والولوج الى عالم الاسهم المثير
وانا عند الموظف التفت وراي واشوف مجموعة كل جالس على مقعده وامامه جهاز
لفت نظري شايب جالس لوحده وامامه لابتوب وترمس دلة وتمر خلاص يعجبك لونه وريحة المهيلة فايحه ويظهر ان الترمس ماقفله الشايب زين
وصراحة اخوكم عاشق للدله المهيلة بشكل ماهو طبيعي وظهر لي ان قهوة الشايب من النوع الفاخر
قلت انا لازم احتال حتى استوطن مع هالشايب على هالمهيلة وفذاتها
خلصت اوراقي وميلت على اللحية الغانمة
قلت السلللللللام عليكم ههههه كان بيني وبينه معرفة
رد بالتحية واحسن منها وقال لي تقهوي حياك الله اييييه هبطت مثل اللي قضى بترولها تريد السلامة
قلت : وشلونك عساك طيب امورك زينه ياجعل عمرك طويل وصب لي فنجال والمفروض اني انا اللي اصب له
قال : بخير وبنعمه كل يوم اجي في هالمكان وافتح هالشاشة وابيع واشري في الاسهم والحمد لله رب العالمين
قلت : طبعا بعد ماثنى لي الفنجال مع كم فذة من الخلاص , يظهر انك متمرس في هالاسهم ولك وقت طويل
قال : لي اكثر من 30 سنة وانا مالي تجارة الا الاسهم جربت قبلها بعض المشاريع ولا فيها الا الغثا
قلت : ناسبتك اجل لا عمال ولا ايجارات ولا جوازات ولا مشاكل
قال : أي والله بس في الاول كنت اخسر ويرتفع ضغطي ولكن بعد فترة تعلمت وعرفت وشلون اغوص لو هاج البحر وتلاطمت امواجه
قلت : ماشاء الله عليك سباح ماهر
لاحظت ان الشايب عينه مسمرة في جهازه واحيانا يقرص بعينه في سهم ويبدا يجهز عملية شراء فيه وفجاه والسهم يرتفع ويضرب يد بيد فرحان من تنفيذ عمليته السريعة
قلت : ماشاء الله عليك ربحت
قال : أي والله تحرك الصيد ونيشت عليه وصدته
قلت : وش عرفك انه السهم بيتحرك فوق ما تخاف انه ينزل ويخسرك
قال : هذه الخبره وما تسوي خلني باقولك شيء
قلت : اذاني صاغيه قل ياشيبة الرحمن
قال : سوق الاسهم مثل سوق السيارات برحه سيارات تدخل وسيارات تطلع وكل يشري ويبيع واخر السوق هذا خسران وهذا ربحان
واحد عجبته سياره في لونها وشكلها وماعنده معرفه وخبره وشراها بهاك المبلغ يظن انه بيربح فيها ويكتشف انه ورط فيها ويريد
الفكه منها وزين لو رجع له راس ماله وهذي حالته لين مايبقى في جيبه ريال 0 وواحد تعلم ثم تعلم لين وصل الى حد ان السياره
يوم تدخل السوق يعرف مخرجه فيها ان كانت تسوى او لا تسوى ولا يستعجل السوق موجود ماينتهي وكل يوم يتجدد 0
قال لي : هو الشريطي المحكحك مثل غيره في سوق السيارات
قلت : لا والله تلقاه تعلم واستفاد من اخطاءه فيما مضى حتى وصل الى ما وصل اليه 0
قال : هذا مثل سوق الاسهم وانت يوم تسالني عن السهم اللي شريت فيه وبعت بربح ترى حال ذاك الشريطي يوم شاف الغنيمة تدخل
السوق تغانمها قبل غيره وشرا وباع في وقته ورجع لعياله وهو ربحان 0
وختم كلامه الطيب وقال : من لا يخطي ويستفيد من اخطاءه ما تقوم له قايمه طول عمره وسلامتك
قلت : وانت سالم وغانم وبيض الله وجهك دنيا واخره واسمح لولدك تراني كثرت من القهوه والتمر من طيب راعيها
قبل لا انسى اذكر احد الاشخاص جا يمه يساله عن سهم واعتقد انه في التامين
قال له الشايب : ابعد عن الشجرة وثعبانها
عرفت ان السهم من الاسهم الخاسرة المتهالكة
ودعته وكلامه يلف براسي (من لا يخطىء ويستفيد من اخطاءه ما تقوم له قايمه طول عمره )
هذا ما حصل لاخوكم الحارثي ذات يوم

الموضوع الأصلي: سالت مرة شايب وقال لي 000 || الكاتب: بقايا عشق || المصدر: منتديات

المصدر: منتديات شمس الحب - من قسم: سلة المحذوفات والمواضيع المكررة