منتديات شمس الحب - يخوان وش اهم بالوظيفة الراتب والموقع .. والا اسم الشركة والبيئة ؟

السلام عليكم ورحمة الله وبركاته

يا اخوان انا خريج كلية الهندسة محتار بين حاجتين

- توظفت بشركة في مقر سكني مع اهلي بالرياض، الشركة شغلها حاليا ما بدأ مره عندها مشاريع قوية ومدعومة بشكل كبييير تبدأ خلال سنة وقعد يجهزون لها حاليا وظفوا عدد كبير جدا من الموظفين يتجهزون للمشاريع، راتبها اقل من راتب ارامكو ب ٢٠٠٠ ريال تقريبا فيها أمان وظيفي مثل ارامكو وسابك،
مشكلتها البيئة اغلب الموجودين صغار ماعندهم خبرة فلازم اعتمد على نفسي بالعمل
وممكن تكون ميزة اني ممكن ابرز بينهم بعد فترة وامسك شيء غير كذا اسمها غير معروف عند الناس يعني الناس يقولون تترك ارامكو وتروح لشركة غير معروفه :(

الخيار الثاني

شركة أرامكو رفضت عرضهم قبل اسبوع لأني ابي قسم ثاني ودقوا علي امس يقنعوني بالقسم اللي حطوني فيه، ميزة ارامكو أنها اسم قوي لما اقول توظفت فيها حتى اللي يقربون لي مستغربين مره كيف رفضت ارامكو ورحت شركة غير معروفه وميزتها الثانية ان بيئتها احترافية ممكن اكثر من الشركة اللي انا فيها حاليا .. لكن راتب ارامكو بيكون اقل من راتب الشركة اللي انا فيها لأني بصرف على نفسي " بالظهران " من ناحية السكن والاكل وغيره على الاقل ٤٠٠٠ بالشهر من الراتب.

اللي خلاني ارجع افكر بالموضوع " بيئة العمل اقل احترافية بالشركة اللي توي توظفت فيها من ارامكو + كلام الناس اللي استغربوا كيف اترك ارامكو واروح لشركة غير معروفه "

فشوروا علي الله يخليكم مع العلم ان ارامكو عطوني مهلة ثانية الى يوم الاثنين القادم أرد عليهم آخر رد.