![]() |
أنــــــــــــــــــــــا وكتـــــــــــوعـــــــــــــــــــه والضـــــــــــــــــب سنين زلت ويا علها ما تعود أوصيت واحدٍ من عيال عمي يدعى مسلط أوصيته يجيب لي معه وهو جاي من الحره ضب أبغى الورعان الصغار عندنا يشوفونه ويربونه ويوالفونه ويعرفوا ان هذا الضب هو مسقط رؤوسهم:hawamer4112 المهم مسلط بن عفتان سلط الله على إبليسه أتاني يحمل الضب في قفص عصافير :hawamer4112 قلت / يا مسلط انت ذال من الضب ؟ قال / لا والله ذال عليكم يا حضران جده ! أخذت الضب وهو صغير بحجم كف يدي دخلت حارتنا وتجمعوا عيال حارتنا لرؤيه هذا الديناصور الصعنطوط وحارتنا كلها حضران ( بيت كتوعه وبيت شلبي وبيت سقف الحيط وبيت باميه ..الخ) قالوا / إش هادا كم عمره هوه؟ قلت / مدري عن قلعته إنشدوه قالوا /فين أُمُه ترضعه كدا راح يموت؟ قلت / هذا ما يرضع إلا لحم قالوا / الناس تربي غزلان والبدو يربوا ضبان أخذته ووضعته على دولاب المطبخ وذهبت لإحضار بزارين بيتنا وعندما عدت وجدت القفص ولم اجد الضب :hawamer4112 والطاقه مفتوحه ولا أعلم الى أين سرى البغيض نزلت أنا وإخواني للبحث عنه خوفا من أن ينكفت على عائله من جيراننا ويأخذ عقولهم:hawamer4112 وبينما نحن في الشارع نتشاور سمعنا صياح من بيت باميه:hawamer0012 قلت لإخواني / راحوا فيهاوش الراي ؟ قال أخي الصغير (وهو حكيمنا)/ حطوا رجولكم وبيت باميه يواجهون مصيرهم ومالناش دعوه قلت له / ياشيخ حرام وش ذنبهم ! قال / ذنبهم انهم سكنوا جنب بدو قلت / عز الله انك صادق لقد أجرموا في حق انفسهم وهربنا ولم نعقب بعد 6 أو 7 شهور جاءتني الشغاله مفجوعه وقالت / بابا أنا شوف وحش في مطبخ :hawamer4112 قلت لها / وحش في بيتنا وفي مطبخنا ؟ قالت / وحش تحت دولاب مطبخ ! مطبخنا كبير وأضنه أكبر من مجلسنا قمت أتهايق وأنا مكذب مصدق وقرأت كل المعوذات في دقيقه وكل خوفي يكون جني ويلتبسني وأنا والله ماني ناقص قلت لها / مافي شئ تهيئات تهيئات .. إذلفي اليوم الثاني جاءتنا جدتي من الطائف زائره وجدتي تقطع 10 أمتار في نصف ساعه وبينما انا اشاهد التلفاز جاءتني جدتي تجري وكأنها غزال وعيونها طالعه وتبغى تتكلم وماهي قادره وتشير بيدها على المطبخ:hawamer3612 وعرفت من يدها وعيونها أن هناك مصيبه بالمطبخ طمرت كالأسد للمطبخ ورأيت منظرا أوقف شعر راسي ويلاه انه الضب ابو قفص تضاعف حجمه اربع مرات ومستوطن عندنا من 7 أشهر رجعت بي الذاكره لايام كنت أدخل المطبخ في الظلام وأخرج الزبادي وأجلس على البلاط أضرب في الزبادي وأتمتع بالأمن والأمان في مطبخ الضب وجدت الضب يتمشى وكأنه راعي محل بل هو راعي محل وعندما رأني إنكفت تحت الدولاب الوصول له صعب جدا ولا يمكن الا بتكسير المطبخ أعلنت حالة الطواري وأخرجت كل من في البيت وعلى رأسهم جدتي التي لم تزورنا بعد هذه المره وأبقيت الشغاله الإندنوسيه التي أظهرت شجاعه منقطعه النظير وأبدت حماسا قويا فى مواجة الضب عدت للمنزل ووجدت جارنا كتوعه لابس رياضه قلت له / من فين وعلى فين ؟ قال / رايح النادي قلت له / انا لك ولا للذيب ؟ قال / يابويه كلنا لبعض إش فيه؟ قلت / في بيتنا ضب يهودي مستوطن قال / إش جابه ؟ قلت / جابه مسلط قال / مين مسلط قلت / ياعمي فكنا .. بتجي معي نخرجه من تحت الدولاب ولا لا ؟ قال / وربي نقطعه أوصال قلت / سنايدي يا كتوعه لبست الله يكرمكم بسطار عسكري من خوفي على رجولي وبدأت حرب التطهير حرقنا اوراق ولعنا حطب وكتمناه كتم انا أولع في الخشب وكتوعه ينغزه بالعصا حتى دخنا وقمنا نكحكح ولم يخرج رغم ان المطبخ صار ظلام من الدخان وفجأه قرر الضب أن يغير موقعه والضب يعرف مطبخنا أكثر منا وخرج ومر من بيني وبين كتوعه بسرعه 200 كم ومن الفجعه نقزت فوق الدولاب ولكن كتوعه الأسد لم يتحرك من مكانه:hawamer6312 رغم ان الضب صار لونه اسود من الدخان ومخيف نظرت لكتوعه وإذا هو متجمد في مكانه !وعيناه شاخصتين في الارض قال / إش هادا ؟ قلت / هذا الضب قال / بسم الله الرحمن الرحيم أنا اش جابني عندك هذا جني ياواد لونه أسود قلت له / ياكتوعه من الدخان صار أسود لا توسوس بي قال / يابويه أسمع نصيحتي جيب شيخ يقرأ عليه تلاته ايام وسيبُه يوم بعدها إذا خرج فهوه شيطان وانقلع وإذا ماخرج جيب الدفاع المدني قلت / ياكتوعه انت تبغى تفضحني من زين وجهي ووجهك صورنا بكره تطلع بالجرائد مع الضب قال / انا اش دخل اهلي فيك وربي هادا شيطان وخرج وتركني أنا والشغاله والضب ثالثنا نسمع قربعته ويرفض الطلوع ولولا الفضيحه لإتصلت على الدفاع المدني طير عقلي وقلبي كتوعه لكن الجاويه والله انها ديبه بنت ديااااابه حشرناه بالدخان والنغز بالمكانس وكل ما خرج ليغير موقعه طمرت أنا كالأسد فوق الدولاب:hawamer3112 أما الجاويه والله انها مع كل خروج له ترصعه بالمكنسه وأخيــــرا إنتفخ وهاج بعد ان جرحته الأندنوسيه وصار شكله يروع بقوه وقررت الإنسحاب من هذه الحرب ولكن الاندنوسيه واصلت الحرب بمفردها حتى وضعته في كرتون وطبعا كنت في اللحضات الاخيره موجها لها غير مشارك ليه أكذب هذي الحقيقه (طبعا لم أخبر بها غيركم والله) ونزلت من بيتنا وكأنني أسد يحمل أسد وذهبت به لمنطقه خاليه وحذفته من الكرتون ويا قوة الله انطلق يعدو وهو هائج وأقسم بربي ان رؤيه الاسد ارحم من رؤيته ( ولا تعلمون أحد ) |
الساعة الآن 05:18 PM بتوقيت مسقط |
Powered by vBulletin® Copyright ©2000 - 2025, Jelsoft Enterprises Ltd.
Search Engine Optimization by vBSEO 3.6.0 Designed & TranZ By
Almuhajir